410 hestafla VW Golf í Worthersee

Á hverju ári sýnir bæði Volkswagen og eigendur breyttra Volkswagen bíla afkvæmi sín, við austurríska vatnið Worthersee. Þessi ökutæki eru alla jafna mikið breytt og mörg æði öflug. Volkswagen mætir með Golf GTI Worthersee Concept bíl sem útlitshannaður var af 13 lærlingum.

Þar fer enginn aumingi er kemur að afli en hann er með 410 hestafla drifrás sem samanstendur af brunavél sem knýja framhjólin og rafmagnsmótorum sem knýja afturhjólin. Rafmótorarnir eru 48 Volt og með hámarkafl uppá 12 kílówött. Bíllinn er með Clubsport vindkljúf að aftan og bíllinn stendur á einstökum 20 tommu felgum.

Engin aftursæti eru í bílnum en öflugu hljóðkerfi bílsins gefið þess meira pláss og bætt við slatta af hátölurum. Framsætin eru rafstillanleg og þau má stilla með appi úr farsíma og til að mynda láta þau nudda ökumann. Sætin eru klædd nappa leðri og alcantara áklæði og saumuð með bláum tvinna í stíl við ytra útlit bílsins.

Volkswagen mun líka sýna Golf GTE langbak sem skartar 16,8 kWh rafhlöðu sem tvöfaldar drægi hans og sérstöku ytra útliti. Worthersee sýningin opnaði þann 24. maí, en þessi sýning dregur á ári hverju að sér margan gestinn.