Rolls Royce frystitogaranna

Stjórn HB Granda hf. hefur ákveðið að ganga til samninga við spænsku skipasmíðastöðina Astilleros Armon Gijon, S.A. um smíði á frystitogara á grundvelli tilboðs. Samningsupphæðin liggur nærri 5 milljörðum króna. Áætlað er að gangi samningar eftir muni skipið verða afhent 2019. Frá þessu er greint á heimasíðu fyrirtækisins.

Togarinn er hannaður af Rolls Royce í Noregi og er 81 metra langur, 17 metra breiður og hefur lestarrými fyrir um þúsund tonn af frystum afurðum á brettum. Er því um eitt stærsta fiskiskip í sögu íslenska flotans að ræða.

Ekki eru fyrirhugaðar frekari nýsmíðar af hálfu félagsins að svo stöddu en félagið gerir nú út 3 frystitogara sem eru smíðaðir á árunum 1988-1992, 4 ísfisktogara og 2 uppsjávarveiðiskip.