Hamar færist nær Domino's deildinni

Hamar er aðeins einum leik frá því að tryggja sér sæti í Domino's deild karla eftir sigur á Val, 73-82, í þriðja leik liðanna í umspili í kvöld.

Valsmenn rúlluðu yfir Hvergerðinga í fyrsta leiknum, 101-73, en þeir hafa svarað fyrir sig með tveimur sigrum í röð. Fjórði leikur liðanna fer fram í Hveragerði á sunnudaginn og með sigri þar tryggja heimamenn sér sæti í Domino's deildinni.

Valsmenn byrjuðu leikinn betur og leiddu með sjö stigum, 25-18, eftir 1. leikhluta. Hamarsmenn spiluðu betur í 2. leikhluta sem þeir unnu með fimm stigum, 24-19. Staðan í hálfleik var því 44-42, Val í vil.

Hvergerðingar héldu Valsmönnum í aðeins 12 stigum í 3. leikhluta en skoruðu sjálfir 21 stig. Staðan fyrir lokaleikhlutann var 56-63, Hamri í vil. Gestirnir létu þessa forystu ekki af hendi og lönduðu góðum sigri, 73-82.

Christopher Woods var atkvæðamestur í liði Hamars með 30 stig, 14 fráköst og fimm stoðsendingar en hann var með lygilega 77% skotnýtingu. Örn Sigurðarson kom næstur með 19 stig og átta fráköst. Þá fékk Hamar 17 stigum af bekknum, gegn aðeins átta hjá Val.

Urald King átti sannkallaðan tröllaleik í liði Vals; skoraði 33 stig, tók 24 fráköst, gaf þrjár stoðsendingar, varði fjögur skot og var með alls 51 framlagspunkt. Birgir Björn Pétursson kom næstur með 11 stig og níu fráköst.

Valur-Hamar 73-82 (25-18, 19-24, 12-21, 17-19)

Valur: Urald King 33/24 fráköst/4 varin skot, Birgir Björn Pétursson 11/9 fráköst, Sigurður Dagur Sturluson 8/4 fráköst, Austin Magnus Bracey 7, Benedikt Blöndal 6/5 fráköst, Oddur Birnir Pétursson 6/4 fráköst, Illugi Auðunsson 2.

Hamar: Christopher Woods 30/14 fráköst/5 stoðsendingar, Örn Sigurðarson 19/8 fráköst, Snorri Þorvaldsson 11/5 fráköst, Erlendur Ágúst Stefánsson 9, Rúnar Ingi Erlingsson 6/7 stoðsendingar, Hilmar Pétursson 5/5 fráköst, Oddur Ólafsson 2.