Margrét Sanders endurkjörin formaður SVÞ

Margrét Sanders var endurkjörin formaður Samtaka verslunar og þjónustu (SVÞ) á aðalfundi samtakanna í morgun. Margrét, sem er ráðgjafi hjá Strategíu, hefur setið sem formaður samtakanna frá árinu 2014.

Á fundinum var jafnframt lýst kjöri þriggja meðstjórnenda í stjórn SVÞ fyrir kjörtímabilið 2017 til 2019 en þeir eru Árni Stefánsson, forstjóri Húsasmiðjunnar, Gústaf B. Ólafsson, framkvæmdastjóri Parka, og Ómar Pálmason, framkvæmdastjóri Aðalskoðunar.

„Verslun og þjónusta á Íslandi stendur á tímamótum, samkeppnin hefur aldrei verið meiri og áskoranir hafa sjaldan verið jafn margar. Samtökin hafa löngum barist fyrir afnámi tolla og gjalda. Nú um áramótin var síðasti tollamúrinn afnuminn og telja samtökin það mikið framfaraskref fyrir neytendur og verslunareigendur. Við höfum einnig talað fyrir því að ríki og sveitarfélög úthýsi mun fleiri verkefnum til einkafyrirtækja. Það hefur jákvæð áhrif á nýsköpun og þróun og eykur jafnframt skilvirkni og dregur úr kostnaði.“ segir Margrét Sanders í tilkynningu frá samtökunum.