Unnið með skot- og brunasár

nýsköpun Góð reynsla af samstarfi lækningavörufyrirtækisins Kerecis og bandarískra varnarmálayfirvalda hefur orðið til þess að síðar á þessu ári verður nýrri vöru fyrirtækisins hleypt af stokkunum. Nú þegar framleiðir Kerecis og selur sára­roð til meðhöndlunar á þrálátum sárum, oft tilkominna vegna sykursýki. Nýja varan er til að meðhöndla skot- og brunasár. Vel hefur gengið að byggja upp sölukerfi fyrirtækisins í Bandaríkjunum.

Hluti af því verkefni sem um ræðir var birting greinar í Journal of Military Medicine í síðustu viku. Kerecis hefur gert þrjá samninga við bandarísk varnarmálayfirvöld; við rannsókna- og lækningavöruinnkaupadeild bandaríska landhersins. Eins vinnur Kerecis að verkefnum með sárarannsóknasetri landhersins og rannsóknamiðstöð sjóhersins.

Vara Kerecis, sem er ísfirskt fyrirtæki að uppruna, er úr þorskroði, ætluð til að meðhöndla þrálát sár og er gjaldgeng hjá félagslega hluta bandaríska heilbrigðiskerfisins, Medicare, sem tryggir alla Bandaríkjamenn sem eru 65 ára og eldri. Vaxandi fjöldi einkarekinna tryggingafyrirtækja greiðir einnig fyrir meðhöndlun þar sem sáraroðið er notað.

Guðmundur Fertram Sigurjónsson, framkvæmdastjóri Kerecis, segir aðspurður að fyrirtækið sé enn á sprotastigi og gefi því ekki upp sölutölur sínar. „En allavega þá hófum við sölu í Bandaríkjunum í janúar 2016 og vorum þá ekki með neina sölumenn, en núna erum við með 20 sölumenn og umboðssölumenn,“ segir Guðmundur Fertram og bætir við að á næstu vikum sé jafnvel tíðinda að vænta af markaðsmálum Kerecis.

Guðmundur Fertram segir frá því að læknaþing Kerecis hafi verið haldið um liðna helgi. Þingið var sótt af læknum sem nota sáraroð Kerecis til meðferðar á lífshættulegum sárum. Þórdís Kolbrún R. Gylfadóttir, ráðherra ferðamála, iðnaðar og nýsköpunar, flutti ávarp við opnun ráðstefnunnar þar sem hún ræddi um nýsköpun á Íslandi og áherslu núverandi ríkisstjórnar á stuðning við nýsköpun og rannsóknir. Hún ræddi m.a. um að gott væri að sjá að aukin framlög til Tækniþróunarsjóðs séu að skila sér í vexti fyrirtækja eins og Kerecis með tækni sem læknar um allan heim séu farnir að tileinka sér.

Sáraroðsþing Kerecis er haldið á Íslandi tvisvar á ári og er gert ráð fyrir að yfir 100 læknar sæki ráðstefnurnar í ár. Kerecis hefur vaxið hratt undanfarin misseri og leggur félagið megináherslu á Bandaríkjamarkað þar sem sáraroð félagsins er endurgreitt hjá Medicare í öllum ríkjum.

„Aflimunum í heiminum vegna sykursýki heldur áfram að fjölga ár frá ári og nálgast nú hálfa milljón árlega. Læknarnir sem tóku þátt í þinginu eru leiðandi á heimsvísu í meðhöndlun á alvarlegum sárum og það er ótrúlega mikilvægt að sjá að sáraroð er orðið meðhöndlunar­úrræði fyrir sjúklinga sem standa frammi fyrir missi á fótum,“ segir Guðmundur Fertram.