Kia söluhæst í febrúar

Kia var söluhæsta bílamerkið á Íslandi í febrúar. Alls voru 156 nýir Kia bílar seldir í mánuðinum en Toyota er í öðru sæti með 155 bíla. Mazda er í þriðja sæti með 118 nýskráningar og Nissan í því fjórða með 114 nýskráningar í febrúar.

,,Það er að sjálfsögðu mikil ánægja í herbúðum Kia hjá Bílaumboðinu Öskju með þennan góða árangur. Við höfum unnið markvist að því að koma Kia í fremstu röð hér á landi og það er auðveldara þegar verið er að vinna með mjög gott bílamerki sem Kia er.

Við höfum verið að kynna nýjar og spennandi gerðir Kia bíla á síðustu mánuðum og það eru mjög spennandi bílar á leiðinni eins og nýjar kynslóðir af Rio og Picanto og svo hinn magnaði Kia Stinger sem fengið hefur mikla athygli og lof erlendis.

Þá er Kia sú bíltegund sem bilar sjaldnast samkvæmt skýrslu sænska tryggingafélagsins Länsförsäkringar um tíðni alvarlegra bilana í nýlegum bílum sem bárust tryggingafélaginu," segir Þorgeir Pálsson, sölustjóri Kia hjá Bílaumboðinu Öskju.

Kia hefur farið mjög vel af stað á þessu ári og er með alls 346 nýja bíla selda á fyrstu tveimur mánuðum ársins. Kia er með 13,5% markaðshlutdeild það sem af er árinu.