Óvenjumikil veiði og friður fyrir hval

„Maður hefur kannski einu sinni áður á áratugalangri starfsævi fengið eitt kast sem var ellefu hundruð tonn, eða eitthvað slíkt. Núna eru fleiri, fleiri bátar að rykkja þessu upp sama daginn,“ segir Ólafur Einarsson, skipstjóri á Heimaey VE – 1, skipi Ísfélags Vestmannaeyja, um atganginn á loðnumiðunum í vikunni.

Eins og komið hefur fram hefur verið mokveiði á loðnumiðunum hjá öllum flotanum frá því að veiðar hófust á mánudag. Það er miklu meira að sjá af loðnu en verið hefur undanfarin ár – og horfa menn reyndar nokkuð langt aftur til að finna hliðstæðu. Eru dæmi um að skip hafi fengið 1.500 tonn í kasti, sem er hreint út sagt ævintýraleg veiði.

Ólafur, en Heimaey lá við bryggju eftir sína aðra löndun á vertíðinni þegar Fréttablaðið hafði samband í gærdag, segir að útlitið hafi verið virkilega gott í vikunni.

„Þetta er búið að vera miklu öflugra en síðustu vertíðir. Það eru miklu þéttari lóðningar og svo er mun minna en var í fyrra af hval – hann hefur nóg að éta einhvers staðar annars staðar, væntanlega loðnu fyrir austan og norðan land,“ segir Ólafur.

Sú kenning hefur verið nefnd við Fréttablaðið að það skipti máli að ekkert af þeirri loðnu sem norsku skipin tóku, eitthvað um 60.000 tonn, var tekið í flottroll – en kenningin er að það splundri loðnutorfunni að draga ítrekað í gegnum hana með stórum flottrollum.

„Það er ómögulegt að segja nokkuð um það. Það kunna einhverjir er skipta máli að halda það, en það eru hreinar getgátur,“ segir Ólafur sem telur það líka ómögulegt að meta hvort hrygningargangan sé stærri en mælingar Hafrannsóknastofnunar gerðu ráð fyrir í byrjun mánaðar.

Ólafur var á leið á miðin í gær, og ætlaði að reyna að ná „einhverju áður en brælir“, en veðurspáin fyrir loðnumiðin er afleit.

Sagan kennir að aðstæður til veiða gætu verið aðrar þegar gefur á sjó aftur, en Ólafur játar því að veðrið hefur gríðarlega mikið að segja um hvernig gengur á loðnuvertíðinni á næstu vikum.

Fréttin birtist fyrst í Fréttablaðinu