Costco muni versla töluvert við innlenda birgja

Ölgerðin, SS og aðrar heildverslanir á borð við Innnes og ÍSAM eru félagsmenn í Félagi atvinnurekenda (FA). Ólafur Þ. Stephensen, framkvæmdastjóri FA, segir útlit fyrir að Costco muni versla „talsvert við innlenda birgja“. „Við vitum líka að þeir verða talsvert í beinum innflutningi á þeim vörum sem þeir eru að selja. Það er ekkert nýtt fyrir heildsölum. Staðan er þannig í dag að stærstu viðskiptavinir margra heildsala eru jafnframt þeirra stærstu keppinautar eða það er að segja verslanakeðjurnar sem eru í beinum innflutningi á vörum. Tilkoma þessa fyrirtækis þýðir því fyrst og fremst aukna samkeppni á öllum sviðum í rauninni,“ segir Ólafur í samtali við Markaðinn.