Endingargóð förðun með fókus á bleikar varir

Sumarið er gengið í garð og af því tilefni kennir förðunarfræðingurinn Hrafnhildur Björk Runólfsdóttir lesendum réttu handtökin þegar kemur að því að kalla fram sumarlega og létta förðun. Hér er lögð áhersla á ljómandi húð og varir í sumarlegum og björtum lit.

1. Undirbúningur húðarinnar

Hrafnhildur lagið mikla áherslu á undirbúning húðarinnar. „Gott er að undirbúa húðina áður en hafist er handa, þrífa hana og setja á sig gott rakakrem. Ég byrjaði á setja Quick Fix Hydra Charged andlitsúða á Sonju en hann inniheldur meðal annars kókosvatn sem gefur húðinni góðan raka og ljóma. Þar á eftir notaði ég Urban Defense-farðagrunn sem jafnar áferð húðarinnar og inniheldur sólarvörn,“ segir Hrafnhildur.

2. Húðin fullkomnuð

Því næst litaleiðrétti Hrafnhildur húðina. „Ég notaði leiðréttingu í bleiku og grænu. Sá bleiki fór undir augnsvæðið til þess að fela bláma og birta. En græni fór á rauðleitu svæðin til þess að draga úr roða. Þar á eftir notaði ég Naked Skin farðann sem inniheldur grænt te og E-vítamín. Ég notaði hyljarann á þau svæði sem máttu við meiri þekju,“ segir Hrafnhildur sem mælir með að setja punktinn yfir i-ið með léttu púðri.

„Til þess að draga fram kinnbeinin notaði ég pallettu í litnum Streak, hún inniheldur sólarpúður, „high­lighter“ og kinnalit. Til þess að fá fallegan ljóma yfir vangann notaði ég alla þrjá litina í palettunni saman í stað þess að nota þá sitt í hvoru lagi. Til þess að fá enn meiri ljóma í tilefni sumarsins þá notaði ég Afterglow „highlighter“-púður í litnum Sin sem er fallegur gylltur litur.“

3. Augabrúnir og augu

„Sonja er með þéttar augabrúnir svo ég þurfti ekki að gera mikið við þær. Ég fyllti aðeins inn í þær með fíngerðum augabrúnablýanti og greiddi svo í gegnum þær með augabrúnageli.“ Fyrir valinu varð svo létt og einföld förðun. Þó að um einfalda augnförðun sé að ræða mælir Hrafnhildur með að nota augnskuggagrunn sem tryggir að förðunin endist vel og lengi. „Eftir að hafa sett augnskuggagrunn á augnlokið notaði ég aðeins einn augnskugga, litinn Faith úr Ultimate Basics palettunni. Honum dreifði ég yfir augnlokið og einnig meðfram neðri augnháralínu til að ramma inn augun. Því næst notaði ég „high­lighterinn“ Luminous, bæði undir augabrúnir og í innri augnkrók.“

4. Sumarlegar varir

„Gott er að ramma inn varirnar með varablýanti til að auðvelda ásetningu og svo að varaliturinn blæði síður. Ég notaði varablýantinn Streak og einn af nýju fljótandi varalitunum okkar í litnum Tryst. Liturinn Tryst er bæði sumarlegur og vatnsheldur, sem hentar vel fyrir sundferðirnar í sumar.“

5. Punkturinn yfir i-ið

„Að lokum spreyjaði ég All nighter Setting spray-andlitsúðanum yfir andlitið á Sonju til að hámarka endinguna,“ útskýrir Hrafnhildur.