Frábær fyrsti hringur hjá Ólafíu Þórunni

Ólafía Þórunn Kristinsdóttir, atvinnukylfingur úr GR, lék einkar vel á fyrsta degi Pure Silk Bahama Classic-mótinu á Bahamaeyjum. Dagurinn var sögulegur en Ólafía er fyrsti Íslendingurinn sem keppir á þessari sterkustu mótaröð heims.

Ólafía lék á 71 höggi í dag, eða á tveimur undir pari. Frábær frammistaða hjá okkar konu sem stimplaði sig rækilega inn.

Ólafía lék fyrstu níu holurnar sérlega vel, eða á tveimur höggum undir pari.

Hún fékk par á fyrstu tveimur holunum á seinni hringnum en svo komu tveir skollar á næstu þremur holum.

Ólafía átti hins vegar góðan endasprett og á síðustu fjórum holunum fékk hún tvo fugla og tvisvar sinnum par.

Eins og staðan er núna er Ólafía í 18. sæti af 108 keppendum.

Keppni heldur áfram á morgun.