Langanesbyggð tapar tugum milljóna á leigusamningum

Langanesbyggð hefur stefnt Heimavöllum fyrir Héraðsdóm Reykjavíkur í von um að losna undan leigusamningum um sex íbúðir á Þórshöfn. Sveitarfélagið hefur tapað um 20 milljónum króna á samningunum sem voru undirritaðir árið 2011 og gilda til tíu ára. Lögmaður leigufélagsins er ósammála túlkun sveitarfélagsins á uppsagnarákvæði samninganna.

Málarekstur Langanesbyggðar byggir á að skýrt ákvæði sé í verðtryggðum samningunum sem geri sveitarfélaginu kleift að segja þeim upp þegar fasteignirnar séu seldar öðru félagi. Íbúðirnar eru í raðhúsunum Miðholti 9 til 19 og voru í eigu V Laugavegs ehf. þegar samningarnir voru undirritaðir. Dótturfélag Heimavalla keypti V Laugaveg árið 2015.

Elías Pétursson, sveitarstjóri Langanesbyggðar, segir í samtali við Fréttablaðið að leigutekjur sveitarfélagsins, sem framleigir íbúðirnar, séu í dag talsvert lægri en sú upphæð sem það greiðir leigusalanum Heimavöllum. Vill hann ekki svara hversu miklu munar en samkvæmt upplýsingum Fréttablaðsins hefur Langanesbyggð tapað um 20 milljónum króna á samkomulaginu og síðustu ár um fjórum milljónum á ári. Leigan er bókfærð sem skuldbinding í bókum sveitarfélagsins og setur því mark sitt á skuldastöðu þess.

„Við erum að reyna að losna út úr samningunum þannig að Heimavellir leigi núverandi íbúum íbúðirnar. Þeir vilja halda okkur áfram sem leigjanda og það eru fjögur ár eftir. Það er skynsamleg meðferð á skattpeningum að athuga hvort okkar skilningur sé ekki réttur,“ segir Elías og tekur fram að sveitarfélagið hafi áður átt í árangurslausum viðræðum við Heimavelli um breytingar á leigusamningunum.

„Ágreiningurinn snýst um það hvort uppsagnarákvæðið komi til framkvæmda annars vegar ef félagið er keypt, eða eigandi fasteignarinnar sé keyptur, eða hins vegar þegar einungis fasteignirnar sjálfar eru keyptar. Það er niðurstaða mín að þeir sem undirrituðu þessa samninga geti ekki staðfest túlkun sveitarfélagsins á uppsagnarákvæðinu,“ segir Steinn S. Finnbogason, lögmaður Heimavalla, sem er stærsta leigufélag landsins.

Arnar og Bjarki Gunnlaugssynir, fjárfestar og fyrrverandi atvinnumenn í knattspyrnu, undirrituðu samningana fyrir hönd V Laugavegs. Bræðurnir voru þá eigendur félagsins og í hluthafahópi þess alveg fram að kaupum Heimavalla á félaginu. Gunnólfur Lárusson var sveitarstjóri Langanesbyggðar árið 2011. Samningarnir voru gagnrýndir af sumum sveitarstjórnarmönnum og íbúum Langanesbyggðar en á fundi sveitarstjórnar í mars 2011 kom fram að leigutekjur myndu einungis standa undir 70 prósentum af greiddri leigu til V Laugavegs. 

Fréttin birtist fyrst í Fréttablaðinu