Kaupþing greiðir 5 milljarða til ríkisins

Kaupþing eignarhaldsfélag þarf að inna af hendi vaxtagreiðslu upp á rúmlega 4,6 milljarða króna til íslenska ríkisins síðar í þessum mánuði.

Greiðslan kemur til vegna 84 milljarða króna veðskuldabréfs sem Kaupþing gaf út til stjórnvalda í ársbyrjun 2016 sem hluta af stöðugleikaframlagi gamla bankans. Skuldabréfið ber 5,5% vexti á ári og er Kaupþingi aðeins heimilt greiða inn á bréfið með fjármunum sem falla til við sölu á 87% hlut félagsins í Arion banka.

Fram til þessa hefur Kaupþing enn ekki selt neitt af hlut sínum í bankanum og þarf því að greiða vexti af öllum höfuðstól skuldabréfsins. Þá getur Kaupþing sömuleiðis ekki greitt sér út arð úr Arion banka og nýtt þá fjármuni til að borga inn á bréfið. Þannig kemur fram í skýringarriti sem lagt var fyrir kröfuhafafund Kaupþings 13. nóvember 2015, sem Fréttablaðið hefur undir höndum, að allar arðgreiðslur Arion banka til Kaupþings fram að sölu á bankanum skuli framseldar, á grundvelli svonefnds fjársópsákvæðis, án endurgjalds til íslenskra stjórnvalda. Það ákvæði skýrir af hverju enginn arður var greiddur út til hluthafa Arion banka á þessu ári þrátt fyrir að bankinn hafi skilað sögulegum 50 milljarða hagnaði á árinu 2015.

Stjórnendur Kaupþings vinna nú að því losa um hlut félagsins í Arion banka með því að halda almennt hlutafjárútboð og skrá bankann í bæði Kauphöll Íslands og í Kauphöllinni í Svíþjóð á fyrri árshelmingi þessa árs. Ekki hefur verið tekin ákvörðun hversu stór hlutur verður seldur í útboðinu.

Miðað við bókfært eigið fé Arion banka í dag er 87% hlutur Kaupþings metinn á um 180 milljarða króna. Vegna afkomuskiptasamnings sem stjórnvöld gerðu við kröfuhafa slitabúsins þá mun hins vegar mikill meirihluti söluandvirðis Arion banka falla í skaut ríkisins.

Samkvæmt lista yfir hluthafa Kaupþings í desember 2016, sem Fréttablaðið hefur undir höndum, eru stærstu eigendur félagsins bandarísku vogunarsjóðirnir Taconic Capital og Och-Ziff Capital Management. 

Fréttin birtist fyrst í Fréttablaðinu