Líklegast að Birna hafi farið upp í rauða bílinn á Laugavegi

Grímur Grímsson, yfirlögregluþjónn sem stýrir rannsókninni á hvarfi Birnu Brjánsdóttur, segir lögregluna telja að hún hafi farið upp í rauða Kia Rio-bifreið við Laugaveg 31 aðfaranótt laugardagsins 14. janúar klukkan 05:25.

Þá sást seinast til Birnu og hefur ekkert spurst til hennar síðan en tveir grænlenskir menn, sem lögreglan grunar að tengist hvarfi Birnu, hafa verið úrskurðaðir í tveggja vikna gæsluvarðhald. Eru þeir grunaðir um manndráp.

Fram kom í gær að lögreglan telur yfirgnæfandi líkur á því að bíllinn sem sést á Laugavegi sé sami bíll og lögreglan lagði hald á í Kópavogi á þriðjudag. Fyrir liggur að Grænlendingarnir höfðu þann bíl til umráða á þeim tíma sem Birna hvarf en þeir tóku hann á leigu á föstudegi og skiluðu aftur á laugardegi. Vísir greindi frá því í gær að rannsóknargögn úr bifreiðinni bendi til þess að misindisverk hafi verið framið þar.

Hafa ekki getað sýnt fram á að Birna hafi verið í samskiptum við mennina áður

Grímur segir að við upphaf rannsóknarinnar á hvarfi Birnu hafi lögreglan talið þrjá möguleika í stöðunni varðandi það hvert hún hafi farið eftir hún hverfur úr myndavélum við Laugaveg 31.

„Það var þá niður Vatnsstíg, í port á bakvið húsið sem er við hliðina á Laugavegi 31 og svo inn í þennan rauða bíl. Ég sagði það sjálfur að ég teldi það ólíklegt að hún hefði farið upp í rauða bílinn því þá vorum við að skoða myndbönd sem bentu til þess að þetta væri svo stuttur tími fyrir bílinn að fara frá einum punkti til annars. En svo höfum við rýnt gögn og teljum að það sé líklegast, af þessum þremur möguleikum, að hún hafi farið upp í bílinn á þessum tímapunkti,“ segir Grímur.

Hann segir lögregluna nú vera að kanna hvort að Birna hafi verið í einhverjum samskiptum við mennina áður en hún fór upp í bílinn til þeirra.

„Við erum að reyna að finna það út en við höfum ekki getað sýnt fram á það,“ segir Grímur.

Hafa kortlagt ferðir bílsins töluvert

Fyrr í vikunni fékk lögreglan heimild til að kanna farsímagögn og athuga hvaða símar koma inn á sama svæði og á sama tíma og sími Birnu aðfaranótt laugardags. Grímur segist ekki geta farið út í það hvort rannsókn á þeim gögnum hafi leitt í ljós að símar Grænlendinganna ferðist á sama hátt og sími Birnu og segir lögreglu enn vera að fara yfir þau gögn.

Þá vinnur lögreglan jafnframt að því að kortleggja ferðir rauða Kia Rio-bílsins.

„Við höfum kortlagt ferðir hans töluvert en það blasir við að við erum ekki með allar upplýsingar frá A til Ö um allar ferðir bílsins en við höfum kortlagt þær töluvert og notast þar við myndbönd úr öryggismyndavélum víða um höfuðborgarsvæðið.“

Aðspurður hvort að rannsókn á bílnum sé lokið segir Grímur að henni sé að mestu lokið. Lögreglan mun þó halda áfram að rannsaka bílinn og segir Grímur að þeir muni halda bílnum vegna rannsóknarinnar en hann er í eigu Bílaleigu Akureyrar.

Greint var frá því í gær að bílaleigan hefði látið lögreglu fá upplýsingar um bílnúmerið á rauðu Kia Rio-bílnum sem tekinn var í Kópavogi. Grímur segir að sú tilkynning hafi verið grundvallarupplýsingar í málinu.

Grunaðir um gríðarlega alvarlegt brot

Lögreglan fór fram á fjögurra vikna gæsluvarðhald yfir mönnunum en Héraðsdómur Reykjaness dæmdi þá í tveggja vikna varðhald. Lögreglan kærði úrskurðinn því til Hæstaréttar en ekki liggur fyrir hvenær niðurstaðan réttarins liggur fyrir. Grímur kveðst þó frekar von á því í dag.

Aðspurður um tímalengdina sem lögreglan fer fram á segir Grímur að mennnirnir tveir séu grunaðir um gríðarlega alvarlegt brot, en eins og áður segir eru þeir grunaðir um manndráp.

„Núna hefur það aðeins komið fram í fjölmiðlum í dag hvað við erum raunverulega með til rannsóknar. Um er að ræða gríðarlega alvarlegt brot, alvarlegasta hegningarlagabrotið, og á þeim grunni þá förum við fram á langt gæsluvarðhald,“ segir Grímur.

Mennirnir verða áfram yfirheyrðir í dag.