UNICEF hefur neyðarsöfnun fyrir hungruð börn í Suður-Súdan, Jemen, Nígeríu og Sómalíu

Hungursneyð ríkir nú í Suður-Súdan og eru Jemen, Nígería og Sómalía jafnframt á barmi hungursneyðar. Ástandið er það versta frá stofnun Sameinuðu þjóðanna fyrir rúmum 70 árum og raunveruleg hætta er á fjórum hungursneyðum í heiminum á sama tíma. Það hefur aldrei gerst áður frá stofnun SÞ.

Þetta kemur fram í tilkynningu frá UNICEF á Íslandi sem hefur í dag neyðarsöfnun fyrir vannærð börn í ríkjunum sem um ræðir.

UNICEF er á vettvangi í öllum fjórum ríkjunum og heldur úti gríðarlega umfangsmiklum neyðaraðgerðum, bæði með hjálp heimsforeldra og þeirra sem styðja neyðarsöfnun UNICEF.

Yngstu börnin berskjölduðust

Haft er eftir Bergsteini Jónssyni, framkvæmdastjóra UNICEF á Íslandi að þegar hafi fjölmargir hér á landi stutt við neyðaraðgerðir UNICEF í Suður-Súdan og það veiti von að finna þann mikla stuðning. „Þar sem hungursneyð vofir nú yfir í þremur ríkjum til viðbótar höfum við ákveðið að blása til sérstakrar neyðarsöfnunar til að bregðast við þessum fordæmalausu aðstæðum,“ segir Bergsteinn.

Í tilkynningunni segir að hungursneyð snerti fólk afar misjafnt eftir aldri. „Slíkt neyðarástand er langhættulegast ungum börnum. Helmingurinn af þeim sem lést í hungursneyðinni í Sómalíu árið 2011 voru börn yngri en fimm ára. Sú hungursneyð var sú seinasta í heiminum á undan Suður-Súdan nú í ár.

Barn sem þjáist af alvarlegri bráðavannæringu – hættulegasta formi vannæringar – er níu sinnum líklegra til að deyja af völdum sjúkdóma en önnur börn sem veikjast. Þetta geta til dæmis verið malaría, lungnabólga og niðurgangspestir.

Niðurgangspestir og mislingar voru megindánarorsökin í hörmungunum í Sómalíu fyrir sex árum. Það sama á við nú og þá að börn deyja ekki einungis vegna skorts á mat. Þau látast einnig vegna þess að þau drekka mengað vatn sem orsakar niðurgangspestir, hafa ekki aðgang að heilsugæslu og missa af lífsnauðsynlegum bólusetningum. Allt gerir þetta þau útsettari en ella fyrir margvíslegum sjúkdómum.“

Segir Bergseteinn að UNICEF leggi af þessum sökum þunga áherslu á að veita margþátta neyðarhjálp. „Bjarga lífi vannærðra barna með því að veita þeim nauðsynlega meðferð, dreifa hreinu vatni, bólusetja börn, tryggja þeim heilsugæslu og sjá til þess að hreinlætismál séu í lagi,“ segir Bergsteinn.

Nánar má lesa um söfnunina á heimasíðu UNICEF en hægt er að styrkja hana með því að senda sms-ið BARN í nr 1900 (1.000 kr), gefa með kreditkorti hér og leggja inn á reikning 701-26-102050, kt 481203-2950.