Sótt að lögreglustjóra Norðvesturlands úr öllum áttum

Hart er nú sótt að Gunnari Jónssyni lögreglustjóra Norðvesturlands vegna uppsagnar á Kristjáni Þorbjarnarsyni yfirlögregluþjóni á Blönduósi, og úr öllum áttum. Efnt hefur verið til undirskriftasöfnunar á netinu þar sem uppsögninni er mótmælt en þegar þetta er skrifað hafa 425 manns ritað nafn sitt þar við.

Kristján lætur ekki beygja sig

Geir Jón Þórisson, fyrrverandi yfirlögregluþjónn og fyrrverandi formaður félags yfirlögregluþjóna, segist ekki ætla að unna sér hvíldar fyrr en uppsögnin hefur verið dregin til baka. Hann hefur sett sig í samband við Sigríði Á. Andersen dómsmálaráðherra en Geir Jón ætlast til að gera að hún beiti sér í málinu.

„Ég er búinn að gera það heyra í henni. Gerði það samdægurs og þessi gjörningur kom upp. Og þá er málið á borði Landsambands lögreglumanna og Félagi yfirlögregluþjóna þar sem ég var formaður. Þess vegna tel ég mér málið skylt.“

Hins vegar hefur ekkert komið frá Sigríði enn sem komið er, varðandi þetta mál. Geir Jón telur víst að hún hafi í mörg horn að líta um þessar mundir. Því hann hefur ekkert heyrt frá henni né fengið nokkurn ádrátt þess efnis að hún muni láta málið til sín taka.

Geir Jón segist hafa heyrt í Kristjáni. Hann sé traustur og láti ekkert beygja sig. „Öflugur og traustur maður, en honum líður auðvitað ekki vel með þetta eftir 36 ára starf. En, lögreglan á Blönduósi er þekkt fyrir skelegga löggæslu,“ segir Geir Jón sem ætlast til þess að Sigríður stigi inní og stöðvi þetta sem hann kallar ósvinnu. Kristján hafi átt eitt ár eftir til að ná fullum eftirlaunum og því skipti þetta verulegu máli fjárhagslega fyrir hann.

Kristján stoltur af þjónustunni við byggðarlagið

Vísir ræddi við Gunnar lögreglustjóra fyrir nokkru en hann vísaði til trúnaðar, hann gæti ekki fjallað um mál einstakra lögreglumanna. Kristján sjálfur hefur hvatt íbúa Húnaþings og fleiri með ávarpi sem birtist á huni.is. Þar segir hann meðal annars:

„Fimmtudaginn 18.05. 2017 var ég kallaður á skrifstofu nýs lögreglustjóra Norðurlands vestra og tilkynnt þar formálalaust að starf mitt væri lagt niður frá og með 1.júní 2017.  Ég mætti hætta störfum þá strax sem ég kaus að gera.

Ég hef sinnt starfi mínu nú í um 36 ár, sem er töluvert langur tími.  Ég er stoltur af því og lít á það sem forréttindi að hafa fengið tækifæri til þess að fá að þjóna þessu byggðarlagi og íbúum þess. Forréttindin liggja í því að hér í byggðarlaginu liggja rætur aldagamallar íslenskrar menningar og sögu, sem er mér afar kær og ég er stoltur að vera hluti af.“

Valdníðsla óreynds lögreglustjóra

Áðurnefndri undirskriftasöfnun er fylgt úr hlaði með því að tala um valdníðslu „af verstu gerð!“ Og skorað á núverandi dómsmálaráðherra að afturkalla þessa aðför óreynds lögreglustjóra að lögreglumanni og að ríkið standi að fullu við fyrirheit fyrrverandi ráðherra dómsmála.“

Þarna er verið að vísa til samkomulags sem Geir Jón segir að sé til staðar í öllum greinargerðum við breytingar á lögum, þegar lögregluembættum var fækkað. En, þá lá fyrir að yfirmenn yrðu of margir. En, gert var ráð fyrir því að það myndi jafna sig út þegar þeir færu á eftirlaun. Geir Jón segist sjálfur hafa hætt 60 ára því hann hafi verið á hinni svokölluðu 90 ára reglu; sem er lífaldur plús starfsaldur. „Ég labbaði þá út og vissi að enginn yrði ráðinn í staðinn fyrir mig. En, það er ekkert allstaðar þannig. Lögreglumenn fara á eftirlaun 65 ára gamlir.“

Ekki skal gera lítið úr starfi lögreglunnar

Ljóst er að lögreglustjórinn á Norðvesturlandi hefur staðið frammi fyrir vanda. Honum er gert að hagræða í rekstri, hann er með 14 manna lögreglulið og löggæslan er ekki flókin í umdæminu sem telur um 7000 íbúa. Mestan part er þetta skipulagning vakta og umferðareftirlit. Víst er að það er ekki ofverkið að stýra því fyrir tvo menn, Gunnar og yfirlögregluþjón auk þá Kristjáns. Gunnar vill hins vegar ekki tjá sig um málefni sem snúa að einstökum starfsmönnum en Vísir spurði Geir Jón hvort þetta væri þá ekki bara spurning um það hvort fækkað væri meðal þeirra, kannski um tvo sem væru í umferðareftirlitinu og hugsanlega mætti spara við sig ræstinguna eða Kristján færi?

„Nei, það gengur ekki að gera lítið úr starfi lögreglunnar,“ segir Geir Jón við þessum hugleiðingum blaðamanns. Honum leist ekkert á þessa spurningu.

„Þessi gjörningur er brot á lögum og samþykktum og 20. grein stjórnarskrár um skipan embættismanna. Lögreglumenn eru embættismenn, sumir æviráðnir en nú er bara ráðið til fimm ára. Til að hægt sé að reka þá verður hann að hafa brotið af sér, fengið áminningu eða dóm. Það var hamrað á þessu við ráðuneytið, að hún taki á þessu að teknu tilliti til þessara laga og samþykkta.“