Bandarískir vogunarsjóðir kæra úrskurð ESA

Tveir bandarískir vogunarsjóðir hafa áfrýjað ákvörðun ESA, eftirlitsstofnunar EFTA, þess efnis að íslensk lög um eign á aflandskrónum og losun fjármagnshafta séu í samræmi við EES-samninginn, til EFTA-dómstólsins. Mbl.is greinir frá þessu.

Sjóðirnir leituðu á náðir ESA í júní fyrra vegna þess að þeir töldu löggjöfina í ósamræmi við EES-sáttmálann. „Kvartanirnar byggðust á því að rök íslenskra stjórnvalda og tilvísun í verndarsjónarmið eigi sér ekki stoð miðað við núverandi efnahagsástand á Íslandi,” segir á vef ESA.

Sjá einnig: Lög um aflandskrónur standast reglur ESA

Úrskurður ESA var kveðinn upp í nóvember síðastliðnum en í honum sagði jafnframt að í sérstökum tilfellum er ríkjum heimilt að innleiða efnahags- og peningastefnu sem miðar að því að yfirstíga efnahagsþrenginga. „Telur ESA að aðgerðir stjórnvalda falli innan þeirrar heimildar,“ segir í úrskurðinum.

Þar segir jafnframt að ESA telji að greiðslujöfnunarvandi Íslands hafi ekki verið leystur og ekki sé öruggt hvort afnám hafta hér á landi hefði í för með sér óstöðugleika.

Bloomberg fjallaði um málið í dag en þar kemur fram að eignir sjóðanna hér á landi nemi milljónum dala en fjármagnshöft geri það að verkum að ekki er hægt að hrófla við fjármunum sjóðanna.