Johnson: Þetta er hrikalega svekkjandi

Besti kylfingur heims, Dustin Johnson, varð að draga sig úr keppni á Masters í gær eftir að hafa dottið í tröppum daginn fyrir mótið.

Johnson hefur verið sjóðheitur síðustu vikur og vann síðustu þrjú mót áður en hann mætti til Augusta.

Hann gerði það sem hann gat til þess að vera með. Fór í meðferð þar sem hann var að drepast í bakinu eftir fallið. Mætti á æfingasvæðið fyrir hringinn en ákvað svo að draga sig úr keppni.

„Ég er að spila mitt besta golf frá upphafi og að lenda síðan í svona slysi. Þetta er hrikalega svekkjandi,“ sagði Johnson við blaðamenn á golfvellinum í gær.

„Ég gerði allt sem ég gat. Ég get sveiflað aðeins en get ekki tekið fulla sveiflu. Ef ég get ekki sveiflað eðlilega þá get ég ekki tekið þátt á Masters.“

En hvernig í fjandanum fór hann að því að detta í tröppum inn í íbúð sem hann var með á leigu?

„Ég var í sokkum og rann í tröppunum. Flaug niður þrjár tröppur og vinstri hliðin neðarlega á bakinu fór illa út úr fallinu. Vinstri olnboginn er líka vel marinn.“