Losað um framdekk á reiðhjólum í Hafnarfirði

Losað var um framdekk á barnahjólum í Vallarhverfinu í Hafnarfirði í síðustu viku. Framdekkið fór svo undan hjólunum þegar þau var á ferð. Tvær mæður hafa sagt frá slíku atviki í Facebook hóp hverfisins en synir þeirra steyptust fram fyrir sig á götuna þegar dekkið fór af hjólinu. Talið er að hjólin hafi hugsanlega verið skemmd á skólalóð Hraunvallaskóla.

„Dekkið skoppaði af þegar hann var að fara niður af gangstétt. Hann datt fram fyrir sig og skrámaðist á báðum olnbogum,“ segir Ólöf Haraldsdóttir móðir annars drengsins sem varð fyrir þessu. Hún segir að þetta sé ekkert annað en líkamsárás og skemmdarverk. Ólöf segir að á dögunum hafi líka verið hleypt loftinu úr dekkjum á öllum reiðhjólum fyrir utan blokkina sem þau búa í. Alls voru það fimm reiðhjól.

„Ég er búin að láta kíkja á hann og tilkynna þetta til lögreglu,“ segir Ólöf en hún hefur einnig látið skólann vita af málinu.

Lögreglan í Hafnarfirði kannaðist við málið en sagði erfitt að gera eitthvað í þessu þegar svo lítið af upplýsingum væru til staðar. Það yrði þó kannski gert ef mörg svona mál kæmu á borð lögreglu

„Farið til öryggis yfir hjól barna ykkar áður en þau fara út á þeim svo að fleiri lendi ekki í þessu,“ segir Ólöf en hún þakkar fyrir að ekki fór verr í þeirra tilfelli. Maður sem var á gangi þegar sonur hennar datt hjálpaði honum að hringja heim.

„Síminn hans virkaði ekki því símkortið datt úr sambandi við höggið. Hann er 11 ára, hann var svolítið smeykur eftir á. Hann hefur ekki farið aftur að hjóla. Við ætlum að yfirfara hjólið betur. Það er sveif á dekkinu sem hefur verið losuð. Þetta hefði getað farið mun verr, hann lenti ekki á höfðinu sem betur fer, en skautar svona á olnbogunum,“ segir Ólöf í samtali við Vísi.

Hinn drengurinn rispaðist í framan og á hné og bólgnaði upp á hné og öxl. Ekki er vitað nákvæmlega hvar hjól drengjanna tveggja voru skemmd en þeir höfðu báðir farið á hjóli í skólann.

Lars Jóhann Imsland skólastjóri í Hraunvallaskóla í Hafnarfirði segir í samtali við Vísi að ekki séu öryggismyndavélar á allri skólalóðinni en það standi til að bæta úr því.

„Mig langar líka að það komi fram að það sé mikilvægt fyrir foreldra að ræða við börnin sín um hvað þetta er hættulegt,” segir Ólöf að lokum.