Viðar Örn inn fyrir Rúrik

Viðar Örn Kjartansson hefur verið kallaður inn í íslenska landsliðshópinn á kostnað Rúriks Gíslasonar. Þetta staðfesti framherjinn í samtali við 433.is í dag.

Rúrik verður í banni í leiknum gegn Úkraínu eftir að hafa fengið rautt spjald í tapinu gegn Finnum í gær.

Viðar Örn hefur ekki verið í landsliðshópnum síðustu mánuði, þrátt fyrir að skora mikið fyrir félagslið sitt, Maccabi Tel-Aviv.

Ísland er í þriðja sæti I-riðils eftir leiki helgarinnar, en Úkraínumenn komust upp fyrir Íslendinga og í annað sætið með sigri á Tyrkjum í gær.