Beyoncé birtir fyrstu myndina af tvíburunum

Bandaríska stórstjarnan Beyoncé birti í gærkvöldi fyrstu myndina af mánaðargömlum tvíburunum sínum og rapparans Jay-Z en myndina birti hún á Instagram-síðu sinni.

Söngkonan heldur á tvíburunum, þeim Sir Carter og Rumi, og stendur fyrir framan einhvers konar blómahlið en myndin er í svipuðum stíl og myndirnar sem Beyoncé setti á samfélagsmiðilinn þegar hún tilkynnti umheiminum um óléttu sína fyrr á árinu.

Meira en tvær milljónir notenda settu „læk“ við myndina á fyrsta klukkutímanum en við hana skrifaði Beyoncé „Sir Carter og Rumi eins mánaða gömul í dag“ og með fylgdu emoji-merki. Þegar þetta skrifað eru komin rúmlega 3,6 milljónir „læka“ við myndina.

Fyrir eiga þau Beyoncé og Jay-Z dótturina Blue Ivy en hún er fimm ára gömul.