Oddvitar framboðslista Flokks fólksins kynntir

Flokkur fólksins kynnti oddvita framboðslista flokksins fyrir alþingiskosningarnar 28. október í Háskólabíó í dag á fjórða tímanum. Inga Sæland mun leiða listann í Reykjavíkurkjördæmi suður, Dr. Ólafur Ísleifsson mun leiða listann í Reykjavíkurkjördæmi norður, Guðmundur Ingi Kristinsson leiðir listann í Suðvesturkjördæmi, Karl Gauti Hjaltason leiðir listann í Suðurkjördæmi, Magnús Þór Hafsteinsson leiðir listann í Norðvesturkjördæmi og Sr. Halldór Gunnarsson leiðir lista Flokks fólksins í Norðausturkjördæmi.

Inga Sæland, formaður flokksins, mun leiða listann í Reykjavíkurkjördæmi suður en hún leiddi listann í kjördæminu í síðustu kosningum. Inga nam lögfræði við Háskóla Íslands.

Dr. Ólafur Ísleifsson mun leiða lista Flokks fólksins í Reykjavíkurkjördæmi Norður. Ólafur starfar sem framkvæmdastjóri gæðamála við Háskólann á Bifröst. Ólafur Ísleifsson hefur lokið doktorsprófi í hagfræði frá Háskóla Íslands. Hann er með meistarapróf í hagfræði frá London School of Economics and Political Science og BS-próf í stærðfræði frá Háskóla Íslands. Ólafur starfaði um tíu ára skeið sem lektor í hagfræði við Háskólann í Reykjavík. Hann hefur að baki fjölþætta starfsreynslu á sviði fjármála og efnahagsmála á vettvangi Seðlabanka Íslands, Þjóðhagsstofnunar, forsætisráðuneytisins og Alþjóðagjaldeyrissjóðsins.

Guðmundur Ingi Kristinsson mun leiða lista Flokks fólksins í Suðvesturkjördæmi. Guðmundur er menntaður trésmiður og starfaði sem lögreglumaður og verslunarstjóri. Hann er einnig formaður BÓTar – samtaka um bætt samfélag fyrir lífeyrisþega. Hann hefur víðtæka reynslu af réttindabaráttu öryrkja og lífeyrisþega, m. a. á vegum Sjálfsbjargar. Leiddi hann jafnframt lista Flokks fólksins í Suðvesturkjördæmi haustið 2016.

Karl Gauti Hjaltason leiðir lista Flokks fólksins í Suðurkjördæmi. Karl er lögfræðingur frá Háskóla Íslands. Karl var sýslumaður í Vestmannaeyjum 1998–2014. Þá var hann oddviti yfirkjörstjórnar í Suðurlandskjördæmi frá 1998 og síðan í hinu nýja Suðurkjördæmi frá 2003. Karl var skólastjóri Lögregluskóla Íslands 2014–2016.

Magnús Þór Hafsteinsson leiðir lista Flokks fólksins í Norðvesturkjördæmi. Magnús er búfræðingur frá Bændaskólanum á Hólum og fiskeldisfræðingur frá Héraðsháskóla Sogn og Firðafylkis í Noregi. Þá er hann með meistaragráðu í fiskifræði frá Háskólanum í Björgvin í Noregi. Magnús var þingmaður 2003–2007 fyrir Frjálslynda flokkinn. Hann er höfundur fjölda bóka um sögu Íslands í seinni heimsstyrjöld. Karl var jafnframt ritstjóri landshlutafréttablaðsins Vesturlands frá 2016. Leiddi hann lista Flokks fólksins í Reykjavíkurkjördæmi norður í síðustu þingkosnginum.

Sr. Halldór Gunnarsson leiðir lista Flokks fólksins í Norðausturkjördæmi. Halldór er fyrrum prestur og bóndi í Holti undir Eyjafjöllum. Þá var hann framkvæmdastjóri Félags hrossabænda og sat á kirkjuþingi og í kirkjuráði. Halldór leiddi lista Flokks fólksins í Suðurkjördæmi í síðustu kosningum.