Síminn lúti sömu kröfum og aðrir gera

„Síminn hefur ekki sætt sig við að lúta sömu kröfum og aðrir þjónustuaðilar og er það miður,“ segir í yfirlýsingu frá Orkuveitu Reykjavíkur vegna gagnrýni forstjóra Símans á vinnubrögð Gagnaveitunnar, dótturfyrirtækis OR.

Í Fréttablaðinu í gær var sagt frá bréfasendingum Orra Haukssonar, forstjóra Símans, til Orkuveitunnar. Gagnrýnir Orri að Gagnaveitan neiti samstarfi um lagningu og rekstur ljósleiðara og að Míla, dótturfyrirtæki Símans, fái ekki að kaupa aðgang að völdum hluta kerfis Gagnaveitunnar heldur standi einungis til boða að kaupa aðgang að öllu kerfinu í heilu lagi. Segir hann Gagnaveituna vinna gegn lögum og misnota opinbert fé til að að hindra samkeppni.

Orkuveitan segir hins vegar í yfirlýsingu sinni að starfsemi Gagnaveitunnar grundvallist á lögum og reglum. Félagið sé undir eftirliti Póst- og fjarskiptastofunnar og Samkeppniseftirlitsins.

„Með tilkomu Ljósleiðarans inn á fjarskiptamarkaðinn hefur samkeppni aukist og valkostum neytenda fjölgað verulega. Það er óumdeild staðreynd. Póst- og fjarskiptastofnun hefur skilgreint Mílu sem markaðsráðandi í fast­línutengingum og hefur verið það um langt árabil,“ segir OR sem kveður það eitt af markmiðum Gagnaveitunnar að efla samkeppni á fjarskiptamarkaði. „Hefur árangur fyrirtækisins sýnt fram á það og að vera neytendum fagnaðarefni.“

Þá segir Orkuveitan að Gagnaveitan sé ekki markaðsráðandi í fastlínutengingum. Það sé Míla hins vegar. „Vegna þeirrar stöðu og vegna sáttar sem Síminn/Míla gerðu við Samkeppniseftirlitið vegna brota hvíla kvaðir á fyrirtækjunum umfram önnur á markaði,“ segir Orkuveitan.

Í Fréttablaðinu í gær sagði forstjóri Símans frá því að Kópavogsbær hafi þurft að skikka Gagnaveituna til að gefa Símanum kost á að vera með í skurðum sem grafnir voru undir ljósleiðara í Kópavogi í júní svo að ekki þyrfti að grafa upp sömu göturnar í tvígang.

„Lausn fékkst í Kópavogi eftir að Míla krafðist hlutdeildar í framkvæmdum GR eftir að þær höfðu verið fullhannaðar, leyfi íbúa fengin, þær boðnar út og um þær samið,“ segir Orkuveitan. Þá hafi Gagnaveitan lagt sig fram um að bjóða Símanum aðgang að Ljósleiðaranum á viðskiptalegum forsendum. „Rétt eins og þeim sex fyrirtækjum sem nú veiti um hann þjónustu í samkeppni þeirra á milli.“