TF-SIF heim á ný eftir tveggja mánaða fjarveru

TF-SIF, flugvél Landhelgisgæslunnar, lenti á Reykjavíkurflugvelli í hádeginu eftir um það bil tveggja mánaða fjarveru frá Íslandi. Þar með er verkefnum flugvélarinnar fyrir Landamæra- og strandgæslustofnun Evrópu Frontex lokið að sinni.

Flugvélin hélt utan um miðjan janúar. Fyrst um sinn hafði hún bækistöðvar í borginni Hania á grísku eynni Krít en var svo færð um set til Catania á Sikiley.

Verkefni vélarinnar fólust í reglubundnu eftirlitsflugi fyrir Frontex víðs vegar um Miðjarðarhafið, meðal annars á hafsvæðum sem bátar og skip sem flytja flótta- og farandfólk til álfunnar sigla um.

Izabella Cooper, talsmaður Frontex, segir að framlag Landhelgisgæslunnar á undanförnum árum hafi skipt miklu máli.

„Ísland hefur lagt sitt af mörkum til starfsemi Frontex allt frá upphafsdögum stofnunarinnar. Íslenska flugvélin og varðskipið hafa á þeim tíma sinnt eftirliti við strendur Spánar, Ítalíu og Grikklands í mörg ár og tryggt þannig landamæri Evrópu og bjargað þúsundum mannslífa,“ er haft eftir Cooper í tilkynningu frá Landhelgisgæslunni.

Vélin mun nú gangast undir hefðbundið viðhald á meðan áhöfnin sækir þjálfun. Að því loknu taka við margvísleg verkefni, fyrst og fremst þó löggæsla og eftirlit á Íslandsmiðum, meðal annars í tengslum við árlegar úthafskarfaveiðar. Búist er við því að TF-SIF fari svo aftur til Miðjarðarhafs á síðari hluta ársins um nokkurra vikna skeið til að sinna frekari verkefnum fyrir Frontex.