Aflaverðmæti ekki minna síðan árið 2010

Aflaverðmæti íslenskra skipa á öllum veiðisvæðum nam 133 milljörðum króna á síðasta ári og dróst saman um 12,1% frá árinu 2015. Þetta kemur fram í hagsjá Landsbankans.

Þar segir að samdráttinn megi að langmestu leyti skrifa á gengisþróun krónunnar, en gengisvísitala krónunnar lækkaði um 10,6% milli ára.

Aflaverðmætið hefur ekki mælst jafn lágt síðan árið 2010 þegar það nam tæpum 133 milljörðum króna.

Af einstökum tegundum hafði loðnubrestur mjög mikil áhrif á breytingu heildaraflaverðmætis milli ára en aflaverðmæti loðnu lækkaði úr tæpum 10 milljörðum króna niður í 2,7 milljarða, eða um 7,3 milljarða króna.

Næstmestu áhrifin voru í aflaverðmæti þorsks en það dróst saman um 3 milljarða króna. Þar á eftir komu karfi með 2,3 milljarða króna samdrátt og ýsa með 2,2 milljarða króna samdrátt. Af þeim tegundum þar sem aflaverðmætið jókst milli ára voru makríll og norsk-íslensk síld með sitthvorn hálfan milljarð króna.

Samdráttur loðnu skýrist fyrst og fremst af minni veiðum en þær drógust saman um 71% milli ára. Af öllum þeim tegundum sem veiddar eru af íslenskum skipum er loðnan sá fiskistofn sem skýrir mest af breytileikanum í aflaverðmæti á árabilinu 2005-2016 og er þar í sérflokki. Þar á eftir kemur makríll og síðan þorskur.