Orri Hauksson var fangavörður í Kvennafangelsinu

Orri Hauksson, forstjóri Símans, var fangavörður í Kvennafangelsinu í Kópavogi, Katrín Olga Jóhannesdóttir, formaður Viðskiptráðs, vann í fiskvinnslu í Bolungarvík, og Ari Kristinn Jónsson, rektor Háskólans í Reykjavík, bar út öll helstu blöð landsins fyrir fimmtán ára afmælið.

Þetta er meðal þess sem kemur fram í grein Ólafs Bielawski, Ferilskrá, sem birtist í Háskólablaðinu Hróðri sem kom út í dag.

Í greininni ræðir Ólafur auk þeirra við Birnu Einarsdóttur, bankastjóra Íslandsbanka, um fyrstu skrefin á vinnumarkaði. Þetta fólk sem er áberandi í íslensku atvinnulífi hefur komið víða við á ferlinum.

Starfsferill Birnu hófst á sveitabýlinu Skarði í Landsveit fyrir um 45 árum. Þangað fór hún í sveit tíu ára gömul og dvaldi öll sumur til tvítugs. Hún sinnti þar barnapössun og heimilisstörfum á bænum.

Birna sinnti einnig verslunarstörfum meðfram námi sínu við Verzlunarskóla Íslands. Hún vann meðal annars í verslun frænda síns Stapafelli í Keflavík í jólatörninni.

Orri Hauksson, forstjóri Símans, fór líka í sveit á sumrin og líkt og Ari Kristinn bar hann út blöð. Þegar hann var fjórtán ára gamall fór hann að vinna við ávaxtasölu og seldi fullann vagn af ávöxtum og grænmeti í miðbæ Reykjavíkur hvernig sem viðraði.

Ævintýramennskan var mikil í Orra sem að réð sig sautján ára á fragtskip hjá útgerðinni Víkurskipum og sigldi með farm til Portúgal. 

Þegar Orri var 21 árs fór hann í sumstarf sem fangavörður í Kvennafangelsinu í Kópavogi. Báðir kvenfangar landsins voru vistaðir þar og fyllt var upp í laus pláss með karlföngum.

Eftir að hafa unnið sem barnfóstra og verið í sveit vann Katrín Olga Jóhannesdóttir, formaður Viðskiptráðs, í sjoppu þar til hún kláraði grunnskóla.

Þegar hún hóf nám við Fjölbrautarskólann í Breiðholti sótti hún um hlutastarf við skúringar samhliða náminu og hélt í það á háskólaárunum.

Það var svo þegar hún var nítján ára að hún hélt til Bolungarvíkur í fiskvinnslu ásamt systur sinni, en þar kynntist hún einmitt eiginmanni sínum.

Eftir að hafa borið út blöð frá tíu til fimmtán ára aldri réð Ari Kristinn Jónsson, rektor HR, sig í hefðbundna sumarvinnu hjá Reykjavíkurborg ásamt félaga sínum.

Þeir byrjuðu í götuvinnuflokki við hellulagnir og viðgerðir á stéttum. Ari hefur alltaf haft mikinn áhuga á tölvum og fékk strax á sautjánda ári sumarvinnu hjá Raunvísindastofnun við tölvuþjónustu. Ari endaði með því að ljúka doktorsgráðu 28 ára og fékk vinnu hjá NASA að því loknu.

Meira má lesa um skrautlegan starfsferil þessara einstaklinga hér fyrir neðan á blaðsíðu sextíu.