82 ára kona leitaði í Kvennaathvarfið

Tíu prósent kvenna sem leituðu til Kvennaathvarfsins á árinu 2015 gerðu það vegna þess að ástandið á heimili þeirra var óbærilegt, þrátt fyrir að ofbeldismaðurinn byggi ekki á heimilinu. Þetta kemur fram í nýrri ársskýrslu Kvennaathvarfsins.

Alls leituðu 846 konur til athvarfsins á árinu en 126 þeirra dvöldu í athvarfinu. 74 börn dvöldu með mæðrum sínum í Kvennaathvarfinu á síðasta ári. Aðeins einu sinni áður, árið 2010, hafa fleiri konur leitað til Kvennaathvarfsins.

Athygli vekur að ríflega þriðjungur leita til athvarfsins vegna fyrrverandi eiginmanns, sambýlismanns eða kærasta. Oftast leituðu konur til athvarfsins á aldrinum 31-40 ára en algengasti aldur ofbeldismanna var 41-50 ára. Elsta kona til að leita til athvarfsins var 82 ára og ofbeldismaðurinn 83 ára.

Langflestir ofbeldismennirnir voru íslenskir. 

Fréttin birtist fyrst í Fréttablaðinu 15 apríl