Sigurbjörn Árni uppskar hnefahögg fyrir veitta aðstoð

Sigurbjörn Árni Arngrímsson, skólameistari í Framhaldsskólanum á Laugum í Þingeyjarsýslu og sérfræðingur Íslands í frjálsum íþróttum, hefur kært pilt á tvítugsaldri til lögreglu fyrir líkamsárás á heimavist skólans á dögunum. Pilturinn er kærasti stúlku sem var í skólanum. DV greindi fyrst frá.

Slær ekki stúlkur og sló því skólameistarann

Forsaga málsins er sú að stúlkan, fyrrverandi nemandi í skólanum, kom á heimavistina til þess að sækja eigur sem hún hafði skilið eftir þar. Taldi stúlkan að hún ætti einhverja muni inni í herbergi hjá einum nemanda skólans og leitaði því til Sigurbjörns, sem hafði samband við þann nemanda, og fékk leyfi til þess að sækja hlutina. Sigurbjörn fór með stúlkunni, og kærasta hennar, á heimavistina. Í kjölfarið kom til orðaskaks á milli stúlknanna tveggja.

„Það kom til einhverra hnippinga þarna á milli stúlknanna, og þá kom strákurinn og sló mig. Hann vildi meina það að önnur stúlkan hefði veist eitthvað að honum, og þar sem hann slægi ekki stúlkur og ég bæri ábyrgð á þessu, þá tæki hann högg á mig í staðinn fyrir það högg sem hann fékk, sagði hann mér,“ segir Sigurbjörn í samtali við Vísi, en hann sakaði ekki alvarlega.

Aumur og marinn

„Þetta var minniháttar. Ég er aumur og marinn bak við vinstra eyrað. Hann sló einu höggi aftan við vinstra eyrað, efst á hálsinum,“

Hann segir að pilturinn hafi líklega reiknað með að til einhverra rifrilda kæmi á milli stelpnanna. „Mér skilst að hann hafi sagt einhverja sögu um aðra stúlkuna, sem hún vildi meina að væri ósönn. Eflaust var hún reið yfir því og fannst hann vera að bera út lygasögur um sig. Réttlætiskenndin er mjög sterk í þessum krökkum og ætli hún hafi ekki ýtt eitthvað við honum eða slegið hann, en ég sá það ekki sjálfur.“

Sigurbjörn segist hafa látið höggið lítið á sig fá. „Ég hélt bara áfram að fara með þeim í gegnum sameiginlegt geymslurými og fór alveg með stráknum þangað,“ segir hann.

Aðspurður hvort sér hafi ekki brugðið við höggið jánkar hann því. „Maður á aldrei von á þessu. Strákurinn var ekkert nálægt mér þarna, þannig að ég reiknaði ekki með þessu á þessum tímapunkti. Ég held hann hafi bara verið að sýna það að hann stæði á rétti sínum, stæði við það sem hann segði.“

Málið hefur verið kært til lögreglu, að sögn Sigurbjörns. „Ég hef kært þetta til lögreglu. Ég kannaði verklagsreglur og þær eru þannig að litið er á svona lagað sem árás á embættið, ekki persónuna sjálfa.“