Bræðurnir neita að hafa skotið úr byssunni

Tveir bræður sem ákærðir eru fyrir stórfellda líkamsárás og ólögmæta nauðung í Breiðholti í mars og júní neituðu sök við þingfestingu málsins í Héraðsdómi Reykjavíkur í morgun. Bræðurnir sæta einnig ákæru vegna skotárásarinnar í Fellahverfi í Breiðholti í ágúst síðastliðnum og hafa jafnframt neitað sök í því máli.

Um er að ræða tvær ákærur. Önnur þeirra varðar líkamsárás sem átti sér stað við Leifasjoppu við Iðufell í mars; á sama stað og skotárásin. Bræðurnir eru sakaðir um að hafa lamið mann ítrekað í höfuðið með kylfu og spýtu og öðrum þeirra er gefið að sök að hafa skvett vatnsblönduðu ammóníaki í andlitið á manninum. Maðurinn hlaut mar á hálsi og höfði og ætingu á augnloki og augnsvæði.

Þá eru þeir sakaðir um að hafa í júlí hótað manni til þess að aka bíl sínum á tiltekinn stað á höfuðborgarsvæðinu vegna deilna um bifreiðaviðskipti. Báðir neituðu þeir þessum liðum ákærunnar.

Hin ákæran er vegna skotárásarinnar 5. ágúst síðastliðinn, en málin tvö voru sameinuð og verða tekin fyrir í byrjun næsta árs. Þar er eldri bróðirinn sakaður um að hafa stofnað lífi og heilsu pars í hættu, og annarra vegfarenda í stórfelldan háska með því að skjóta úr afsagaðri haglabyssu á almannafæri. Sá yngri er ákærður fyrir tilraun til manndráps, og fyrir hættubrot og vopnalagabrot með því að hafa beint haglabyssunni að bíl sem fyrrnefnt par sat í.