Herðubreið er uppáhaldsfjallið

Ólafur Darri Andrason hefur verið skipaður skrifstofustjóri skrifstofu hagmála og fjárlaga í velferðarráðuneytinu. Hann var einn þeirra fjögurra umsækjenda sem sérstök hæfnisnefnd taldi hæfasta til að gegna embættinu.

Ólafur Darri er með B.Sc. í hagfræði og meistarapróf í viðskiptafræði með áherslu á fjármál. Hann hefur unnið í rúm þrettán ár hjá Alþýðusambandinu og segir það hafa verið krefjandi og skemmtilegan vettvang. „En eftir dálitla umhugsun þá langaði mig til að breyta til og ég sá spennandi starf.“ Hann segir nýja starfið áskorun en skrifstofa hagmála og fjárlaga haldi utan um fjárveitingar ríkisins til heilbrigðis- og velferðarmála.

Ólafur Darri segir að síðustu ár hafi verið mjög spennandi á vettvangi Alþýðusambandsins og margt hafi þróast til betri vegar. Nú standi yfir vinna við að bæta kjarasamningsgerðina og hafi frumkvæðið að þeim breytingum komið frá aðilum vinnumarkaðarins. „Það hefur verið vinna í gangi frá árinu 2013. Þá ákváðum við að skoða hvað við gætum lært af félögum okkar á Norðurlöndunum sem hafa náð að auka kaupmátt meira en við en jafnframt búið við stöðugleika. Í kjölfarið settum við í gang vinnu, þar sem er verið að skoða hvað við getum gert betur í okkar samningsgerð,“ segir Ólafur Darri.

Nú sé búið að ganga frá þessu samkomulagi sem menn hafa kallað SALEK-samkomulagið. „Vonandi náum við að bæta kjarasamningsgerðina hjá okkur með það að markmiði að tryggja hagsæld okkar félagsmanna enn betur,“ segir hann.

Helsta áhugamál Ólafs Darra utan vinnunnar er útivist. „Ég hef óskaplega gaman af því að vera úti í náttúrunni, ganga á fjöll og fara í löng bakpokaferðalög,“ segir hann.

Ólafur Darri segir erfitt að nefna eitt fjall sem uppáhaldsfjall en upp í hugann komi Herðubreið. „Ég gekk á Herðubreið fyrir nokkrum árum í óskaplega fallegu veðri og þá sá maður landið liggja fyrir fótum sér. Það stendur svo stakt, þetta fjall, og maður sér svo víða,“ segir hann.

Að auki hefur Ólafur Darri mjög gaman af að hlaupa og það lengsta sem hann hefur hlaupið er Laugavegurinn, en hann er um 55 kílómetrar. „Ég hef hlaupið hann tvisvar,“ segir Ólafur Darri sem einnig á að baki nokkur maraþon. Hann segir að fjallgöngur og maraþon séu mjög góður undirbúningur fyrir Laugaveginn.

Ólafur Darri er fjölskyldumaður, á konu, tvö börn og tvö tengdabörn og eitt barnabarn. Kona hans er Kristjana Bjarnadóttir og hún er forstöðumaður vefjaflokkunar í Blóðbankanum. Hún er menntaður líffræðingur.