Ingibjörg Pálma eignast 1% í Högum

Félag í eigu Ingibjargar Pálmadóttur, stærsta hluthafa fjölmiðlafyrirtækisins 365, hefur eignast eins prósents hlut í smásölurisanum Högum. Fyrirtækið rekur meðal annars Bónus og Hagkaup.

DV greinir frá þessu. Nýstofnað fjárfestingarfélag, SM Investments ehfs., keypti hlutinn en samkvæmt heimildum DV er eini hluthafi þess annað félag á vegum Ingibajargar.

Samkvæmt núverandi gengi bréfa Haga er eignarhlutur SM investments metinn á tæpar 600 milljónir króna.

Jón Ásgeir Jóhannesson, eiginmaður Ingibjargar, og fjölskylda hans voru aðaleigendur Haga þar til þau misstu fyrirtækið úr sínum höndum fyrir sjö árum.