Vann upp fimm högga forskot á lokahringnum

Suður-Afríkumaðurinn Charl Schwartzl fagnaði sigri á Valspar-mótinu sem lauk í gærkvöldi en þetta var hans fyrsti sigur á PGA-mótaröðinni síðan hann vann Masters-mótið árið 2011.

Schwartzel náði að vinna upp fimm högga forystu Bill Haas á lokahringnum og hafði svo betur í bráðabana þar sem hann vann strax á fyrstu holu með stuttu pútti.

Haas gerði stór mistök þegar hann reyndi að slá úr sandgryfju við hlið flatarinnar en það gerði það að verkum að Schwartzel mátti tvípútta fyrir sigrinum, sem reyndist einfalt verk.

Hann spilaði á 67 höggum á lokahringnum og var á sjö höggum undir pari eftir hringinn, sem og Haas. Ryan Moore endaði í þriðja sæti á fimm höggum undir pari.

Þetta eru góðar fréttir fyrir Schwartzel fyrir Masters-mótið sem fer fram í næsta mánuði en ríkjandi meistari þess móts, Jordan Spieth, náði að bjarga sér þokkalega fyrir horn eftir afar erfiða byrjun á mótinu í Flórída um helgina.

Spieth var meðal neðstu manna eftir fyrsta hringinn en komst þó í gegnum niðurskurðinn eftir góðan annan dag. Hann endaði svo í átjánda sæti mótsins eftir að hafa spilað á 73 höggum í gær.

Lee McCoy, 22 ára áhugamaður, náði afar áhugaverðum árangri en hann lék á 69 höggum á lokahringnum og endaði í fjórða sæti.

Um næstu helgi fer fram Arnold Palmer Invitaional mótið en fyrsta útsending frá því verður á Golfstöðinni á fimmtudag klukkan 18.00.