Efast um að húsnæðismálin verði kláruð fyrir kosningar

Eygló Harðardóttir, félags - og húsnæðismálaráðherra, segist vongóð um að húsnæðisfrumvörp hennar nái í gegnum þingið áður en kosið verður í haust. Formaður Sambands íslenskra sveitarfélaga efast aftur á móti um að það takist í tæka tíð.

Almennir kjarasamningar haldast í hendur við húsnæðisfrumvörp Eyglóar Harðardóttur félags og húsnæðismálaráðherra. Frumvörpin hafa verið í vinnslu frá byrjun kjörtímabilsins og en vinnslan hefur gengið erfiðlega. Húsnæðismálin eru eitt þeirra brýnu verkefna sem ríkisstjórnin ætlar klára áður en gengið verður til kosninga í haust. Eygló á von á að frumvörpin komi út úr nefnd mjög fljótlega.

„Við erum búin að vinna gífurlega mikið að þessu í mörg ár. Það að við skyldum ná samkomulagi við aðila vinnumarkaðarins, að þetta sé grundvöllur að fjögurra ára kjarasamningum, sem sagt frið á vinnumarkaði, að við skulum vera að gera þetta líka í svona góðu samstarfi við sveitarfélögin, sem eru hér að koma saman og funda og eru að fara yfir þetta og eru að undirbúa sig, það sýnir bara hvað þetta mál er brýnt og hvað það skiptir miklu máli að við ljúkum þessu.“

Nái frumvörpin ekki í gegn í tíma yrði það forsendubrestur í kjarasamningum sem gæti haft miklar afleiðingar í för með sér.

„Þetta eru mál sem hafa farið í gegnum ríkisstjórn. Þetta eru mál sem hafa verið unnin að fleirum en mínu ráðuneyti. Þetta eru mál sem liggur fyrir að við ætlum að klára og við getum svo í framhaldinu gengið til kosninga,“ segir Eygló.

Halldór Halldórsson, formaður sambands íslenskra sveitarfélaga, er aftur á móti ekki vongóður um að það takist.

„Ég verð að viðurkenna að við höfum áhyggjur af því að ráðherra komi þessum málum ekki í gegn. Og við vorum farin að hafa þær áður en þessi uppákoma varð núna í stjórnmálunum á Alþingi og í ríkisstjórn. Ég verð bara að segja alveg eins og er að þessi frumvörp ráðherra, sem öll eru lögð fram af góðum hug og eftir ágætis undirbúning þau virðast samt sem áður þurfa mjög mikla vinnu inni í þinginu miðað við þær meldingar sem við fengum um daginn. Þannig að við erum svolítið áhyggjufull yfir því að ráðherra muni eiga í erfiðleikum með að koma þessu í gegn.“