Fluttur með þyrlu eftir bílslys

Þyrla Landhelgisgæslunnar lagði af stað frá Reykjavík um klukkan hálf sex í morgun til að flytja mann á Landspítalann í Fossvogi eftir bílslys á Holtavörðuheiði. Þyrlan lenti klukkan rúmlega sjö í Reykjavík en ekki er vitað um ástand mannsins að svo stöddu.

Rétt fyrir klukkan níu í gærkvöldi var tilkynnt um umferðaróhapp við Úlfarfell þar sem fjórhjóli hafði verði ekið út af vegi og missti ökumaðurinn meðvitund við fallið. Ökumaðurinn, sem er erlendur ferðamaður, var fluttur með sjúkrabifreið á slysadeild til aðhlynningar.

Þá barst lögreglu um klukkan sex í gær tilkynning um umferðarslys á Álftanesvegi. Fimm voru fluttir á slysadeild en meiðsl reyndust ekki alvarleg. Annar ökumaðurinn er grunaður um of hraðan og ölvunarakstur.