Sækja slasaðan farþega eftir að bíl var ekið fram af hengju við Jökulheima

Björgunarsveitir frá Hellu og Flúðum hafa verið kallaðar út eftir bílslys við Jökulheima. Tildrög slyssins voru þau að bílnum var ekið fram af hengju og við það slasaðist farþegi í framsæti. Björgunarsveitir flytja með sér sjúkraflutningamenn. Talið er að það taki um þrjá tíma fyrir bjargir að komast á slysstað. Þyrla Landhelgisgæslunnar er ekki tiltæk eins og er.

Uppfært klukkan 21:39:

Svanur Sævar Lárusson, sem er í svæðisstjórn björgunarsveita á Suðurlandi, segir færið það gott að hann á allt von á að björgunarfólk komist mun fyrr á slysstað en upphaflega var talið. Farþeginn er ekki lífshættulega slasaður.