„Húrra yfir því að vera hóra“

„Lífið í hinu femínska helvíti er bara ljúft. Við kunnum ekkert að skammast okkar. Húrra fyrir því að vera hóra. Það er voðalega gaman, hann er eitthvað að misskilja þetta,“ segir Bryndís Eva Ásmundsdóttir um predikun baptista prestsins Steven Anderson sem gerði meintan hórdóm hennar og annarra íslenskra kvenna að umræðuefni sínu undir yfirskriftinni „þjóð bastarða". Þar sagði hann meðal annars að Ísland væri „femínskt helvíti“. 

Ástæðan fyrir því að hann gerði Ísland umfjöllunarefni sínu var frétt CNN frá því í mars sem fjallaði um „ófhefðbundin“ íslensk fjölskyldugildi út frá þeirri staðreynd að 67% íslenskra barna fæðast hér utan hjónabands. „Þetta er óvæntur titill sem ég hef eignað mér. Að vera táknmynd skandinavísk saurlífis. Okkur brá svolítið fyrst en aðallega höfum við gaman að þessu. Þetta er mjög langt gengið í geðveikinni.“

CNN hafði samband eftir predikunina

Bryndís segir að það hafi hrúgast inn vinabeiðnir frá mis vafasömum mönnum eftir að viðtalið birtist á sínum tíma. Hún segist ekki hafa orðið fyrir beinu áreiti vegna þessa. Í gær höfðu svo þáttastjórnendur CNN samband við hana til þess að ítreka að viðbrögð predikarans séu ekki í takt við þau viðbrögð er þeir hafi orðið var við.

„Bandaríkin skiptast kannski í tvennt með þessar týpur og þá sem okkur finnst meira réttþenkjandi. Samt var ákveðinn hugsunarháttur hjá þeim líka í því hvernig þeir báru þetta fram. Sögðu að við kusum að lifa svona „án nokkurra skammar eða eftirsjá“. Það eitt er töluvert gildishlaðið þó svo að þeir reyni að vera kúl með þetta. Þeir voru sjálfir svolítið hissa að þetta væri í alvöru í lagi og að fólk geti gengið hér um með höfuðið hátt þrátt fyrir að svona sé í gangi.“

Bryndís segir þetta áhugavert dæmi um hvernig trúarbrögð séu stundum notuð sem stjórntæki karla yfir konum. Hún bendir til dæmis á að hvergi sé minnst á kærasta hennar Sigurð Eggertsson í umfjöllun um frétt CNN og segir í gríni að hann fái hvergi viðurkenningu fyrir sinn hórdóm þó að hann sé í sömu stöðu og hún.

„Predikarinn talar alltaf um konur. Leggur áherslu á að konan eigi að vera hrein mey og annað. Það er aldrei lögð áhersla á að kallinn eigi að vera það líka.“

„Virðist vera í lagi að glenna fætur sínar fyrir hvern sem er“

Í gær tóku þáttastjórnendur Harmageddon á X-inu símaviðtal við Steven Anderson sem sagðist vera leiður yfir því að það sé stöðugt verið að éta ofan í þjóð sína að vera meira eins og hinar „dásamlegu“ Skandínavíuþjóðir.

„Ég var að reyna kenna fólkinu mínu að Ísland er í raun vondur staður og að við eigum ekki að fylgja í fótspor ykkar. Íslendingar verða líka að heyra það að þið eruð ekki að lifa lífi sem er samþykkt af Guði,“ segir Steven meðal annars í viðtalinu.

„Í stað þess að skammast ykkar þá virðist þið vera stolt af þessu. Þarna virðist það bara vera í lagi að konur glenni fótleggi sína fyrir hvern sem er og séu hórur. Miðað við þessa tölu hljómar eins og meirihluti kvenna á Íslandi séu hórur. Margir skilgreina hórur sem konur sem fá greitt fyrir kynlíf en Biblían segir að konur sem sofi hjá mörgum körlum án þess að fá greitt fyrir það séu jafnvel verri en hórur.“

Femínismi og Biblía fara ekki saman

Steven segir femínisma og boðskap Biblíunnar fara illa saman og talaði um Ísland sem „feminista-helvíti“ í predikun sinni.

„Það er ekkert leyndarmál að Ísland er leiðandi þjóð hvað femínisma varðar. Venjulegir menn vilja ekki láta konu stjórna sér, það skapar honum helvíti. Ef ég væri giftur konu sem væri uppreisnargjörn, væri að reyna segja mér hvað ég ætti að gera í stað þess að lúta mínum vilja, yrði það persónulegt helvíti. Biblían segir að það eigi að kenna ungum konum að vera allsgáðar, að elska menn sína og börn. Að vera auðmjúkar á heimilum sínum og hlýðnar mönnum sínum. Femínismi er því algjörlega á skjöni við boðskap Biblíunnar.“

Þegar þáttastjórnendur spurðu hvort hann tryði því að Íslendingar væru flestir á leið til helju eftir þetta jarðlíf sagði hann að það færi alfarið eftir því hvort þeir samþykktu Jesú Krist sem frelsara sinn eður ei. En þar sem hann vissi að mikið trúleysi ríkti á Íslandi væri hann sannfærður um að 99% Íslendinga væru á leið á stóra grillið niðri.

„Mér finnst fyndið hvernig þið horfið á þessa stöðu ykkar sem jákvæða þróun. Þetta er eins hér í Bandaríkjunum þar sem við eigum núna að horfa á viðurkenningu á samkynhneigðar sem jákvæða þróun. En ef þú skoðar tölfræði þá sérðu að það að vera samkynhneigður eykur líkur á HIV smiti um 85%. Þannig að þessir „stórkostlegu háþróuðu“ lifnaðarhættir framleiða bara kynsjúkdóma, bastarðabörn, eykur notkun á geðlyfjum og fleira. Þetta er ekki betra en það var. Ég er viss um að Ísland var betri staður áður en þetta var svona. Þið eruð á leið niður klósettið.“

Heyra má viðtal Harmageddon við Steven í heild sinni hér;