Ríkið tekur úr gildi yfirlýsingu um ábyrgð á innistæðum landsmanna

Eftir samráð við Fjármálaeftirlitið og Seðlabanka Íslands hefur ríkisstjórn Íslands ákveðið að ekki sé tilefni til að hafa í gildi yfirlýsingu um ábyrgð ríkissjóðs á innistæðum í innlendum viðskiptabönkum og sparisjóðum og útibúum þeirra hér á landi.

Yfirlýsingin var send út þann 6. október 2008 og er svohljóðandi: „Ríkisstjórn Íslands áréttar að innstæður í innlendum viðskiptabönkum og sparisjóðum og útibúum þeirra hér á landi verða tryggðar að fullu. Með innstæðum er átt við allar innstæður almennra sparifjáreigenda og fyrirtækja sem trygging innstæðudeildar Tryggingasjóðs innstæðueigenda tekur til.“

Yfirlýsingin var gefin eftir fjármálahrunið haustið 2008. Í frétt fjármála- og efnahagsráðuneytisins kemur fram að innlendar innlánsstofnanir standi í dag traustum fótum hvað varðar eigið fé, fjármögnun, lausafé og jafnvægi í rekstri.

Þar segir einnig að viðamiklar breytingar hafi orðið á lagaumhverfi fjármálamarkaða á síðustu árum frá setningu neyðaralaga árið 2008, til að mynda breytingar á lögum um fjármálafyrirtæki árið 2010 og breytingar á lagaumhverfi fjármálamarkaða.

Í frétt ráðuneytisins segir að áfram sé unnið að því að styrkja nauðsynlegt öryggisnet um fjármálamarkaði og fjölga úrræðum opinberra eftirlitsaðila og stjórnvalda til að grípa tímanlega inn þegar þörf krefur. Á vegum fjármála- og efnahagsráðuneytisins sé nú unnið að innleiðingu nýs Evrópuregluverks um skilameðferð fjármálafyrirtækja og innleiðingu nýrra Evrópureglna um einistæðutryggingar sem munu styðja við regluverk um skilameðferð.

Yfirlýsingu ríkisstjórnarinnar sem send var út í dag má lesa í heild sinni hér.