Alþjóðlegur leiðangur rannsakar stærð hrygningarstofns makríls

Hafrannsóknastofnun tekur þátt í fjölþjóðlegum leiðangri þar sem markmiðið er að áætla stærð hrygningarstofns makríls í Norðaustur-Atlantshafi. Leiðangurinn er skipulagður af Alþjóðahafrannsóknaráðinu (ICES), og lét hafrannsóknaskipið Bjarni Sæmundsson úr höfn í byrjun maí til rannsóknarstarfa.

Mælingarnar eru mikilvægur hluti af stofnstærðarmælingu og þar með mati á veiðiþoli makrílstofnsins. Við stofnmatið er beitt svokallaðri eggjaframleiðslu­aðferð en hún byggir á að meta fjölda eggja á hrygningarsvæði makrílsins. Hrygning makríls hefst við strendur Portúgals í febrúar og teygir sig allt norður í íslensku landhelgina og lýkur í byrjun ágúst.

Sýnatakan er þar af leiðandi gríðar­lega umfangsmikil en alls koma að henni tíu Evrópulönd (Portúgal, Spánn, Írland, Bretland, Holland, Danmörk, Þýskaland, Noregur, Færeyjar og Ísland) og ellefu rannsóknastofnanir og er hún framkvæmd þriðja hvert ár. Á vegum þessara stofnana eru farnir tuttugu rannsóknaleiðangrar frá því í febrúar og fram í ágúst.

Hafrannsóknastofnun tekur nú þátt í verkefninu í þriðja sinn og verður rs. Bjarni Sæmundsson við rannsóknir í tvær vikur á hafsvæðinu milli Skotlands og Færeyja.

Bráðabirgðaniðurstöður verkefnisins munu liggja fyrir í haust.

Fréttin birtist fyrst í Fréttablaðinu 11. maí.