Sjálfstæðismenn vilja setja á ráðningabann

Stjórnmál „Ég hef alltaf lagt áherslu á að það eigi að koma ráðningabann. 212 auka stöðugildi er óútskýrð hækkun og bara þau eru einn og hálfur milljarður á ári,“ segir Halldór Halldórsson, oddviti sjálfstæðismanna í Reykjavíkurborg. Fyrir liggur að Reykjavíkurborg þarf að ráðast í mikinn niðurskurð til að rétta rekstrarhalla borgarinnar við.

Samkvæmt rekstrarreikningi borgarinnar var rekstrarniðurstaða A- og B-hluta reikningsins neikvæð um nærri fimm milljarða króna. Áætlað var að niðurstaðan yrði jákvæð um nærri 7,4 milljarða. Í ársreikningi borgarinnar kemur fram að þetta skýrist að stórum hluta af auknum og óvæntum lífeyrisskuldbindingum.

„Við eigum ekki að láta þessar reiknistærðir þvælast fyrir okkur og byrgja okkur sýn. Hækkun lífeyrisskuldbindinga í ár kemur til út af kjarasamningum og af því að stærðfræðingar hafa ákveðið að reikna út frá hærri lífaldri,“ segir Halldór.

Lausnir Sjálfstæðisflokksins felist, eins og áður segir, í ráðningabanni. „Það hætta margir á ári og við eigum að nýta okkur það í stað þess að reka fólk. En ef þetta heldur svona áfram þá þýðir það hagræðingaraðgerðir og uppsagnir.“

Þá segir Halldór að fresta hafi mátt framkvæmdum í borginni, svo sem þrengingu á Grensásvegi og uppbyggingu við Borgarbókasafn.

Björn Blöndal, formaður borgarráðs, segir að vissulega hafi starfsmönnum borgarinnar fjölgað á síðustu árum. „Að hluta til má rekja það til þess að búið var að ganga nærri því starfsfólki sem var fyrir. Það má segja að við höfum gefið örlítinn slaka til að finna út hver er raunveruleg þörf á starfsmönnum.“

Hann segir að sviðsstjórum verði falið að meta raunverulega þörf sína.

„Við höfum verið með ráðningarrýni sem byggir á því að metið sé gaumgæfilega ef starf losnar hvort hægt sé að komast af án þess að ráða í það aftur. Ef einhver telur að búa þurfi til nýtt starf er þörfin á því sömuleiðis rýnd mjög náið. Ég hef ekki orðið var við það að fólk innan borgarkerfisins sé ekki að gera neitt en það verður auðvitað að gæta aðhalds við starfsmannahald í svona stóru batteríi fyrir átta þúsund starfsmenn.“ 

Fréttin birtist fyrst í Fréttablaðinu 11. maí.