Ummæli um vafasama starfsemi gjaldkera „í meginatriðum sönn“

Hæstiréttur sýknaði í dag fyrrverandi formann Sjómanna- og vélstjórafélags Grindavíkur af kröfum fyrrverandi gjaldkera félagsins, sem krafðist ómerkingar ummæla sem formaðurinn fyrrverandi hafði haft uppi og fór fram á miskabætur. Formaðurinn dreifði til félagsmanna á aðalfundi félagsins árið 2013 blaði þar sem störf gjaldkerans voru gagnrýnd.

Ummælin sem gjaldkerinn fór fram á að yrðu ómerkt sneru að útdeilingu fjármuna félagsins. Sagði þar meðal annars að eiginkona og bróðir gjaldkerans hefðu þegið háa styrki úr sjóðum félagsins á liðnu ári og að endurskoðandi segði að fjármunir félagsins hefðu verið notaðir til kaupa án þess að fram kæmi hvort kaupin tengdust starfsemi félagsins.

Bæði Héraðsdómur Reykjaness og Hæstiréttur féllust á það með formanninum að það sem fram hefði komið á blaðinu væri í meginatriðum satt. Ummælin byggðu á bréfum löggilts endurskoðanda félagsins og gögnum úr bókhaldi þess.

Taldi Hæstiréttur að á formanninum hefði hvílt sú skylda að hafa eftirlit með starfsemi félagsins og upplýsa félagsmenn um hugsanleg brot eða mistök í starfi þess.

Formaðurinn var því sýknaður af öllum kröfum gjaldkerans og var gjaldkeranum gert að greiða 750 þúsund krónur í málskostnað. Hann hafði farið fram á eina milljón króna í miskabætur og hálfa milljón til viðbótar til að standa straum af kostnaði við það að láta birta dóminn í nokkrum helstu fjölmiðlum landsins.