Sautján þúsund íbúar í sameinuðu Árnesþingi

„Sjálfur held ég að sóknarfærin séu miklu meiri en það sem við töpum á því,“ segir Gunnar Þorgeirsson, oddviti Grímsnes- og Grafningshrepps, sem óskar nú eftir því að öll sveitarfélög í Árnessýslu tilnefni fyrir haustið tvo fulltrúa hvert til að skoða kosti og galla þess að sameina Árnessýslu í eitt sveitarfélag.

„Jarðvegurinn var mjög jákvæður,“ segir Gunnar um viðtökur sem hann fékk er hann reifaði sameiningarhugmyndina á fundi héraðsnefndar Árnesinga í lok apríl. Sveitarfélögin hafi með sér mikinn samrekstur í verkefnum á borð við Tónlistarskóla Árnesinga, Brunavarnir í Árnessýslum og byggðasafn.

„Eftir því sem við höfum viðrað þetta meira, bæði formlega og óformlega, þá tel ég nú skynsamlegt að Árnessýsla ætti að skoða hver væri í raun og veru kosturinn við að sameina öll sveitarfélögin í eitt sveitarfélag,“ segir Gunnar.

Íbúar sameinaða sveitarfélagsins yrðu um sautján þúsund. Sameinuð Árnessýsla yrði fimmta fjölmennasta sveitarfélag landsins á undan Reykjanesbæ þar sem búa ríflega 15.200 manns og á eftir Akureyri með um 18.300 íbúa. „Þetta yrði eitt af öflugustu sveitarfélögum landsins,“ segir Gunnar.

Um kosti sameiningar nefnir Gunnar að fækka myndi öllum hliðar­samningum og draga úr byggðasamlagsrekstri. „Það er svo sem ágætt til síns brúks en það verður ekki mikil framþróun í þessu og það er mikið af einyrkjastörfum í svona byggðasamlagskerfi,“ segir hann.

Þá bendir Gunnar á að í sveitarfélagi af slíkri stærðargráðu yrði horft allt öðru vísi á markaðssetningu á sveitarfélaginu.

„Við erum náttúrlega með allflestar náttúruperlur Suðurlands í boði fyrir ferðamennina og samþætt ferðamálastefna fyrir svæðið í heild sinni væri mjög skynsamleg,“ segir Gunnar. Hann er formaður Samtaka sunnlenskra sveitarfélaga og kveður einmitt hafa verið rætt um sameiginlega ferðamálastefnu á þeim vettvangi.

Gunnar rifjar upp að lengi hafi verið rætt um að sameina uppsveitir Árnessýslu. „En miðað við þau verkefni sem við erum komin með í dag þykir það orðin hálfgerð millilending. Þá velta menn því fyrir sér hvort það sé ekki skynsamlegt að skoða þann kost að fara bara alla leið,“ segir hann.

Aðspurður kveðst Gunnar ekki eiga von á öðru en að öll sveitarfélögin tilnefni fulltrúa. „Auðvitað getur niðurstaðan verið sú að þetta sé ekki skynsamlegt en það er þá bara niðurstaðan. En nafnið er til; sveitarfélagið myndi væntanlega heita Árnesþing og þjóðsöngurinn er til og heitir Árnesþing. Þannig að þetta er ekki mjög flókið og svo er bara smotterí eftir,“ segir oddvitinn og hlær. 

Fréttin birtist fyrst í Fréttablaðinu 14. maí