Ríkið styrkir sveitarfélög á Austurlandi

Ríkisstjórnin ákvað í gær að veita fjórum sveitarfélögum á Austurlandi fjárstyrki, til að mæta útgjöldum vegna flóða og óveðurs í lok síðasta árs.

Þar að auki fá þrjár ríkisstofnanir styrk af sömu ástæðu og einnig vegna afleiðinga Skaftárhlaups. Styrkirnir nema samtals tæplega 320 milljónum króna.

„Ljóst er að fjárhagslegt tjón sveitarfélaga var þó nokkurt og erfitt fyrir þau að takast á við það án stuðnings,“ segir Sigurður Ingi Jóhannsson forsætisráðherra.

Þau sveitarfélög sem fá styrk eru Fjarðabyggð sem fær rúmar 43 milljónir króna, Breiðdalshreppur fær 14 milljónir, Borgarfjörður eystri fær 1,5 milljónir og Djúpavogshreppur fær 1,7 milljónir.

Fréttin birtist fyrst í Fréttablaðinu 16. apríl.