Enn dregur úr atvinnuleysi: Ekki mælst jafn lágt í júlí síðan 2007

Hlutfall atvinnulausra af vinnuafli mældist 2,1 prósent í júlí síðastliðinn, en hlutfall starfandi af mannfjölda var 84,4 prósent.

Samkvæmt vinnumarkaðsrannsókn Hagstofu Íslands voru að jafnaði 205.400 manns á aldrinum 16 til 74 ára á vinnumarkaði í júlí 2016, sem jafngildir 86,2% atvinnuþátttöku. Af þeim voru 201.100 starfandi og 4.300 án vinnu og í atvinnuleit.

„Samanburður mælinga fyrir júlí 2015 og 2016 sýnir að atvinnuþátttakan jókst um 1,9 prósentustig. Fjöldi starfandi jókst um 11.600 og hlutfallið af mannfjölda hækkaði um 2,6 stig. Atvinnulausum fækkaði um 1.600 manns og hlutfall þeirra af vinnuaflinu lækkaði um 0,9 prósentustig. Atvinnuleysi hefur ekki mælst jafn lágt í júlímánuði síðan árið 2007 þegar það mældist 1,8%,“ segir í frétt Hagstofunnar.