Forgangsstýring á ljósum ætluð til að greiða leið sjúkraflutninga

Kerfi til forgangsstýringar á umferðarljósum fyrir neyðarbifreiðar var formlega prufukeyrt í dag. Dagur B. Eggertsson borgarstjóri og Jón Viðar Mattíasson slökkviliðsstjóri ræstu formlega búnað sem gefur neyðarbílum forgang á umferðarljósum, svokallaða græna bylgju.

Leiðin sem var prufukeyrð í morgun var frá Slökkvistöðinni í Skógarhlíð um Bústaðaveg og Snorrabraut að Sæbraut, en leiðin er mikilvæg fyrir viðbragðstíma neyðarbíla slökkviliðsins og greiðir leið sjúkraflutninga að Landspítala.

Í frétt á vef Reykjavíkurborgar er haft eftir Degi B. Eggertssyni borgarstjóra að hann væri ánægður með þennan áfanga í samstarfi viðbragðsaðila. Verið væri að nýta möguleika sem felast í Snjallborginni Reykjavík til að bæta öryggi samborgaranna, en forgangsstýringin byggi á miðlægri stýringu umferðarljósa í Reykjavík. „Þetta er einnig hluti í að gera almenningssamgöngur að betri valkosti í Reykjavík. Við erum að fjölga forgangsakreinum og græn bylgja fyrir Strætó er einnig hluti af þeirri áætlun,“ segir Dagur.

Stjórnbúnaður settur í bíla

Í fréttinni kemur fram að í sumar hafi verið gerðar nauðsynlegar breytingar á stýribúnaði umferðaljósa á gatnamótum á þessari leið.  „Á næstunni verður stjórnbúnaður settur í neyðarbíla slökkviliðsins, bæði slökkvi- og sjúkrabifreiðar og fer þá kerfið sjálfkrafa í gang þegar bifreiðarnar aka á forgangsljósum (bláum ljósum) og tryggir forgang á viðkomandi ljósum. 

Markmið verkefnisins er að tryggja aukið öryggi í neyðarakstri, bæði fyrir þá sem eru í neyðarakstrinum en ekki síður almenna umferð sem neyðaraksturinn snertir hverju sinni.  Einnig er lykilatriði þegar fólk er í lífshættu að stytta viðbragðstíma, ekki síst þegar umferð er mikil.

Fyrsta forgangsleiðin er valin vegna aksturs frá slökkvistöð og tengingar við Landspítalann. Gatnamót sem nú þegar hafa verið búin út með nýrri stýringu og hugbúnaði eru:

• Bústaðavegur-Flugvallarvegur
• Bústaðavegur-Hringbraut
• Hringbraut-Snorrabraut
• Snorrabraut-Egilsgata-Flókagata
• Snorrabraut-Bergþórugata-Grettisgata
• Snorrabraut-Laugavegur-Hverfisgata

Strætó verður einnig á grænu ljósi

Strætó mun einnig njóta þess í náinni framtíð að eiga greiðari leið um gatnamót með hinni nýju stýringu, þó það verði ekki forgangsstýring eins og hjá slökkviliðinu. Stýringin mun virka þannig hjá strætó að tæki í vagninum mun skynja þegar vagn nálgast gatnamót og þá lengist tíminn sem grænu ljósin loga í akstursstefnu þeirra.

Uppfæra þarf búnað í vögnunum til að gera þetta virkt og er sú vinna í gangi hjá Strætó,“ segir í fréttinni.