Hefur alltaf valið sér krefjandi störf

Guðný Helga Herbertsdóttir var á dögunum ráðin markaðsstjóri VÍS og hefur störf þar eftir nokkrar vikur. Guðný Helga mun leiða markaðs- og ímyndarstarf VÍS sem og stefnumótun markaðsdeildar. Hún hefur að undanförnu gegnt stöðu deildarstjóra samskiptadeildar Landspítala, allt frá fyrri hluta árs 2015.

„Þetta er mjög spennandi, mig langaði að breyta til og færa mig meira yfir í markaðsmálin. En ég er þó þeirrar skoðunar að línan þarna á milli sé rosalega fín. Þú verður alltaf að horfa á það sem kemur frá stofnun og fyrirtæki sem eina heild hvort sem maður er almannatengill eða í markaðsdeild,“ segir hún.

Guðný Helga er með BS-gráðu í viðskiptafræði frá Háskóla Íslands og mastersgráðu frá Viðskiptaháskólanum í Árósum í Danmörku. Áður var hún upplýsingafulltrúi Íslandsbanka þar sem hún leiddi einnig stefnumótun bankans í samfélagsábyrgð. Fyrir það starfaði hún um árabil sem fréttamaður og þáttastjórnandi hjá 365 miðlum.

„Þetta er búinn að vera ævintýralegur tími hjá Landspítalanum og það eru forréttindi að fá tækifæri til að kynnast þjóðarsjúkrahúsinu eins vel og ég hef gert. Ég hef séð hluti og kynnst hlutum sem ég hefði annars ekki haft tækifæri til. Fólk sem vinnur í heilbrigðisgeiranum gerir það vegna hugsjónar og það verður öðruvísi ástríða í því,“ segir Guðný Helga.

Frá því að hún tók við starfinu á Landspítalanum hefur margt gengið þar á, hún segist þó ekki fara vegna mikils álags. „Ég hef alltaf valið mér þannig störf að það sé mikið að gera hjá mér. Ég var viðskiptablaðamaður í hruninu, ég vann hjá bönkunum eftir hrun og vann hjá Landspítalanum í gegnum verkföll. Álag á ekki illa við mig,“ segir hún.

Maður Guðnýjar Helgu er Pétur Rúnar Pétursson flugstjóri og eiga þau samtals fjögur börn. „Við erum með börn á öllum skólastigum í Garðabæ, þannig að það má segja að við séum að nýta útsvarið sem best,“ segir Guðný Helga kímin.

Utan vinnunnar fer því mikill tími í fjölskylduna. „Við erum með litla stelpu sem er þriggja ára þannig að það sem við gerum í frítíma okkar er mjög mikið fjölskyldutengt. Við höfum spilað mikið golf í gegnum tíðina, en forgjöfin fór hressilega niður þegar yngsta barnið bættist við. Svo höfum við farið á skíði og verið dugleg að ferðast. Einnig finnst okkur voða gott að hitta vini okkar, borða góðan mat og drekka gott vín,“ segir Guðný Helga.