Vísað að hluta úr héraði í gerðardóm

 Vísað hefur verið frá dómi að hluta deilumálum vegna sölu ALMC (áður Straumur-Burðarás) á hugbúnaðarfyrirtækinu LS Retail á síðasta ári. Kveðinn var upp úrskurður þar að lútandi í Héraðsdómi Reykjavíkur á miðvikudag.

Viti ehf., félag í eigu Aðalsteins Valdimarssonar, sem átti 6,9 prósenta hlut í LS Retail, höfðaði í haust mál vegna sölunnar og síðan bættust við málareksturinn fimmtán lykilstarfsmenn LS Retail sem vegna kaupréttarsamninga áttu að fá í sinn hlut fimmtung af söluandvirði fyrirtækisins. Telur hópurinn sig hlunnfarinn í viðskiptunum þar sem fyrirtækið hafi verið selt á verði sem væri langt undir raunverulegu verðmæti.

Í úrskurði héraðsdóms kemur fram að LS Retail hafi verið selt fyrir 17,6 milljónir evra (rúma 2,5 milljarða króna). Fréttablaðið greindi frá því 24.??febrúar síðastliðinn að endurskoðandi sem starfsmannahópurinn kallaði til hafi metið virði fyrirtækisins á 70 milljónir evra (tæpa 10 milljarða króna).

Málarekstrinum var vísað frá dómi utan kyrrsetningarkröfu á hluta söluandvirðis fyrirtækisins sem Sýslumaðurinn á höfuðborgarsvæðinu féllst á, bæði hvað varðar kröfu Vita ehf. og starfsmannahópsins. Viti krafðist kyrrsetningar á rúmum 5,0 milljónum evra (rúmum 707 milljónum króna), auk 28,5 milljóna króna, alls sem svarar um 736 milljónum króna. Kyrrsetningarkrafa starfsmannanna er öllu hærri, eða sem svarar fimmtungi af metnu 70 milljóna evra söluverðmæti, eða 14 milljónir evra (tæpir tveir milljarðar króna).

Í rökstuðningi Ingibjargar Þorsteinsdóttur héraðsdómara er vísað til ákvæða í kaup- og kaupréttarsamningum Vita ehf. og starfsmannanna um að deilum vegna eignarhlutar þeirra í LS Retail beri að vísa til gerðardóms og þeir afsali sér rétti til að leita til almennra dómstóla. Kröfum var því vísað frá dómi og málskostnaður fellur niður, en þó þannig að eftir eigi að taka afstöðu til þess hvort skilyrði til kyrrsetningar séu fyrir hendi. Þær kröfur séu skýrar.

„Eftir atvikum kann endanleg úrlausn þessa máls að bíða niðurstöðu þess úrlausnaraðila [innsk. gerðardóms],“ segir í niðurstöðukafla úrskurðarins.