ÁTVR hagnaðist um 1.221 milljónir árið 2015

Áfengis- og tóbaksverslun ríkisins hagnaðist um 1.221 milljónir króna á árinu 2015 en greiddur var 1.500 milljón króna arður í rikissjóð. Þetta kemur fram í ársskýrslu fyrirtækisins sem kom inn á vefinn fyrir skemmstu.

Alls voru seldir 19.603 þúsund lítrar af áfengi en þar af nam bjórsala 15.280 þúsund lítrum. Sala jókst um 2,01% frá árinu 2014 en þetta er fjórða árið í röð sem sala eykst. Í árið 2014 jókst sala um 3,02%. Sala áfengis nálgast nú það sem hún var á árunum 2007-2008 og þá er þetta besta söluár ÁTVR frá árinu 2010.

„Í þjóðfélaginu hefur mikið verið rætt um fyrirkomulag áfengissölu á Íslandi. Lagt var fyrir Alþingi frumvarp nánast samhljóða frumvarpi frá fyrra ári þar sem gert er ráð fyrir að leggja ÁTVR niður í núverandi mynd og leyfa sölu áfengis í matvöruverslunum. Í könnun sem Gallup framkvæmdi voru landsmenn spurðir um ánægju um fyrirkomulag áfengissölu á Íslandi. Niðurstaðan er að vaxandi fylgi er við núverandi fyrirkomulag og eru 59% ánægðir, 25% hlutlausir og 16% óánægðir,“ segir meðal annars í ársskýrslunni.

Sala á neftóbaki eykst enn

Sala á vindlum og vindlingum heldur áfram að dragast saman en aftur á móti seldust rúm 36 tonn af neftóbaki. Sala á því tók duglegt stökk milli áranna 2013 og 2014 og heldur áfram að aukast nú.

Þá dróst sala á plastpokum saman en um 37 prósent viðskiptavina kaupa plastpoka samanborið við 40 prósent í fyrra. 35.000 fjölnota plastpokar voru seldir á árinu en það er aukning um rúm tólf prósent.

Í árslok störfuðu 442 manns hjá ÁTVR en þar af voru 214 fastráðnir. Fleiri konur starfa hjá fyrirtækinu en sex af hverjum tíu starfsmönnum eru kvenkyns. Hjá fastráðnum lækkar hlutfallið niður í 52 prósent á móti 48.

Vinsælasti lagerbjór síðasta árs var Víking Gylltur en tæplega 1,6 milljón lítra seldist af honum. Það er rúmlega tvöfalt meira en næstvinsælasti lagerbjórinn, Víking Lager. Í þriðja sæti var Egils Gull sem seldist í rúmum 575 þúsund lítrum.

Í flokki öls og annarra bjórtegunda þá tróndi Einstök White Ale á toppnum með rétt rúma hundraðþúsund lítra. Pale Ale, frá sama framleiðanda, var í öðru sæti með tæpa áttatíuþúsund lítra en það er tvöfalt meira en Jólagull sem var í þriðja sæti.

Ársskýrsluna má skoða í heild sinni hér.