Aðgát þarf við línur á fjöllum

„Að venju má búast við að ferðalög á fjöllum aukist þegar páskar eru fram undan og því vill Landsnet minna á að víða á hálendinu getur verið hættulega stutt upp í háspennulínur vegna mikilla snjóalaga,“ segir í tilkynningu Landsnets.

Áréttað er að háspennulínur eru ekki alltaf sýnilegar vegna snjóa og slæms skyggnis. „Við verstu aðstæður geta leiðarar verið á kafi í snjó og lífsnauðsynlegt að gæta ýtrustu varúðar.“

Allir sem ætla að fara á fjöll eru því hvattir til að fara með mikilli gát nærri háspennulínum og -möstrum.

„Góð regla er að athuga hvort og þá hvar háspennulínur liggja um þau svæði sem ferðast skal um, áður en lagt er af stað,“ segir í tilkynningunni.

Fréttin birtist fyrst í Fréttablaðinu 24. mars.