Sögunni endalausu lokið: H&M nú þegar með mikla markaðshlutdeild

Mörgum Íslendingum til mikillar gleði var í dag tilkynnt að H&M myndi opna verslanir hér á landi. Oft hefur verið rætt um komu fatarisans til Íslands en ekkert hefur orðið af því fyrr en nú. H&M er nú þegar með mikla markaðshlutdeild hér á landi þrátt fyrir að engin verslun sé starfrækt.

Samkvæmt greiningu Fréttablaðsins á tölum frá Meniga var H&M með 17,7 prósent markaðshlutdeild á fatavörumarkaði og var það vinsælasta fataverslunin á Íslandi þrátt fyrir að hér væri engin verslun starfrækt.

Sjá einnig:H&M kemur í Smáralind og Hafnartorg

Hlutdeild H&M í fataverslun Íslendinga nær einkum til barnafata en í könnun Capacent frá árinu 2012 sem gerð var fyrir samtök verslunar og þjónustu kom fram að 42 prósent aðspurðra hafi keypt barnaföt síðast erlendis, af þeim sögðust 62 prósent hafa verslað barnafötin í H&M.

Stefnt er að því að verslanir opni í Smáraling og á Hafnartorgi í miðbæ Reykjavíkur auk þess sem viðræður standa yfir um opnun verslunar í Kringlunni.

Sjá einnig: Á von á sambærilegu verði í H&M á Íslandi

Helgi S. Gunnarsson, forstjóri Regins hf. segist reikna með því að verð á fötum verði sambærileg við verð í verslununum í öðrum löndum og að koma H&M til landsins muni styrkja íslenska verslun til vegna sterkrar markaðshlutdeildar H&M.

Gjörningar, sögusagnir og múgæsingur

Undanfarin ára hafa fréttir verið birtar með reglulegu millibili um að H&M sé að koma til landsins, síðast í ágúst á síðasta ári

Sérstakur Facebook-hópur var opnaður í ágúst þar sem tilkynnt var um opnun H&M á Íslandi. Viðbrögðin létu ekki á sér standa.

„„OMG!!!!! GEÐVEIKT !!!! Er svo til í að fá gjafabréf frá ykkur ekki slæmt að dressa sig upp fyrir jólin í H&M á ÍSLANDI,“ var á meðal viðbragða en á einum degi söfnuðust á annað þúsund manns í Facebook-hópinn.

Sjá einnig:Fagna of snemma: „Velkomin til Íslands“

Menn virðast þó hafa fagnað of snemma því skömmu seinna tilkynntu forsvarsmenn H&M að verslunin væri ekki á leið til Íslands.

Árið 2011 var einnig reynt að lokka sænska fatarisann til Íslands án árangurs en mikið var rætt um H&M myndu opna tvær verslanir hér á landi, þar af eina á Laugavegi 89 þar sem áður var verslun Sautján.

„Ég er búinn að verja töluverðum tíma sem framkvæmdastjóri miðborgarinnar okkar í að útvega Hennes & Mauritz upplýsingar um hverfið sem þeir eru að horfa til, efsta hluta Laugavegarins, bílastæða, fjölda verslana í kring og hverslags verslanir það eru. Þeir eru að skoða þetta mál í fullri alvöru,“ sagði Jakob Frímann Magnússon, miðborgarstjóri á sínum tíma við Vísi.

Vinna Jakobs bar þó ekki árangur því ekki kom H&M til landsins í það skiptið.

Landsmenn spenntust þó upp á nýjan leik ári síðar þegar búið var að setja upp borða í sama húsnæði. Á borðanum stóð H&M opnar hér í fyrsta sinn á Íslandi.

Sjá einnig:Nemendur LHÍ að baki H&M gjörningnum

Margir urðu ansi spenntir en í ljós kom að aðeins var um gjörning að ræða sem annars árs nemendur í Listaháskóla Íslands stóðu fyrir.

„Þetta eru gjörningamenn sem eru búnir að festa McDonalds merki á einum stað og H&M á öðrum,“ sagði Jakob Frímann Magnússon miðborgarstjóri.

Koma H&M til landsins nú er þó enginn gjörningur og því ljóst að bráðum geta Íslendingar verslað föt frá sænska fatarisanum sem aldrei fyrr.