Leyfa konunum ekki að vera með

Meðlimir Muirfield-golfklúbbsins í Skotlandi felldu þá tillögu að leyfa konum að ganga í þennan fræga golfklúbb.

Muirfield er einn af golfvöllunum sem hýsa reglulega opna breska meistaramótið í golfi en mótið fór síðast fram þar árið 2013 þegar Bandaríkjamaðurinn Phil Mickelson fagnaði sigri.

Meðlimir Muirfield-golfklúbbsins voru búnir að velta fyrir sér þessari tillögu í tvö ár en 432 af 648 meðlimum þurfti að segja já svo að konur fengju leyfi að ganga í klúbbinn.

Meðal þeirra sem hafa unnið breska meistaramótið á Muirfield-golfvellinum eru þeir Jack Nicklaus (1966), Tom Watson (1980), Nick Faldo (1987 og 1992) og Ernie Els (2002).

Muirfield og Royal Troon eru einu klúbbarnir sem hýsa opna breska meistaramótið sem leyfi ekki konum að taka þátt.

Royal Troon heldur mótið í ár en þar er sér karla- og kvennaklúbbur. Meðlimir Royal Troon eru að velta því fyrir sér í dag hvort að það sé rétt að breyta því.

Þessi atkvæðagreiðsla mun hafa þær afleiðingar í för með sér fyrir Muirfield-golfklúbbinn að hann fær ekki að halda aftur opna breska meistaramótið í golfi og það breytist ekki fyrr en konurnar fá að ganga í klúbbinn.

Það er því líklegt að slík pressa muni á endanum bera árangur og meðlimir klúbbsins átti sig á því að það er komið árið 2016.