Höfnin í Þorlákshöfn dýpkuð fyrir siglingar til Rotterdam

„Þetta verkefni er mögulegt vegna endurbóta á höfninni á síðastliðnum tveimur árum og þær eru yfirstandandi. Verið er að skipuleggja svæðið í kringum höfnina með tilliti til hafsækinnar starfsemi. Þetta kallar á töluverða umferð og breytingar hérna hjá okkur,“ segir Gunnsteinn R. Ómarsson, bæjarstjóri sveitarfélagsins Ölfuss, en færeyska skipafélagið Smyril Line Cargo hefur ákveðið að hefja beinar vikulegar siglingar milli Þorlákshafnar og Rotterdam strax í byrjun apríl. Ferjusiglingarnar munu stórauka umsvif í Þorlákshöfn og væntingar eru um að þær stuðli að vexti og atvinnuuppbyggingu í sveitarfélaginu.

Gunnsteinn segir alla á tánum varðandi verkefnið og gott samstarf hafi tekist við Smyril Line og Vegagerðina síðustu mánuði. Byggja þarf ramp til að þjóna ferjunni en hún er nítján þúsund tonna skip sem tekur 90 tengivagna og 500 bíla í hverri ferð. Höfnin hefur m.a. verið dýpkuð til muna og fullbúin frystigeymsla stendur við höfnina og þar er mikið landrými og lausar byggingalóðir fyrir atvinnustarfsemi.

Smyril Line keypti skipið sérstaklega vegna þessa verkefnis sem hefur sérstöðu í vöruflutningum frá Íslandi. Um svokallaða Ro/Ro (eða Roll on-Roll off) vöruflutninga er að ræða, þar sem varan er flutt í tengivögnum sem keyrðir eru um borð í skip. Það telja aðstandendur verkefnisins að tryggi örugga vörumeðhöndlun þar sem ekki þarf að hífa vöruna um borð, eins og tíðkast í hefðbundnum gámaflutningum.

Gunnsteinn telur að ruðnings­áhrif þessa verkefnis geti orðið víðtæk, en það velti á því hvernig verkefnið gengur. Stefnt hefur verið á að byggja Þorlákshöfn upp með tilliti til flutninga og stórskipaumferðar, og í því felst viss framtíðarsýn eftir að útgerð og fiskvinnsla gaf eftir.

„Það opnar margar dyr að fá svona stórt skip hingað. Í framhaldinu vænti ég þess að fleiri aðilar horfi til svæðisins í framhaldinu. Við teljum jafnframt að þetta opni möguleika fyrir félög í sjávarútvegi að beina sinni starfsemi hingað. Þetta er þjónustubót sem aðilar í þeim geira geta ekki horft fram hjá,“ segir Gunnsteinn og bætir við að ef vel gengur þá sé vel hugsanlegt að fjölga ferðum. Þá skapist gjörbreytt landslag til flutninga frá svæðinu.

Eins og kunnugt er rekur fyrirtækið farþega- og vöruflutningaferjuna Norrænu sem á sér heimahöfn hérlendis á Seyðisfirði. Engar breytingar eru fyrirhugaðar á rekstri Norrænu og einungis verður boðið upp á vöruflutninga á nýju siglingaleiðinni.

Linda Björk Gunnlaugsdóttir, framkvæmdastjóri Smyril Line Cargo á Íslandi, segir í tilkynningu að nýja siglingaleiðin skapi tengimöguleika við markaðssvæði, s.s. Pólland og Eystrasaltslöndin, með vöruumskipun í Færeyjum þaðan sem Smyril Line Cargo er með tvær vöruflutningaferjur í áætlunarsiglingum til St. Pétursborgar og Eystrasaltslanda. Flutningstíminn mun verða sá stysti sem boðið er upp á í sjóflutningum til og frá landinu.

Fréttin birtist fyrst í Fréttablaðinu.